Az.R-ədə İroni mədəniyyətə rujon dəbəvunien

İyunə manqi 27-ku tosə iyuli 1-minə ruji Az.R-ədə İroni mədəniyyətə rujon dəbəvarde. "Maide.az" bı barədə xəbə doəşe ki, ım rujon vaxti de İroni nəcimə sənəti ustoon iştiraki konserton, numayişqahon, kino və teatrə təmoşon təşkil bəkarden.

İron İslamə Respublika Mədəniyyət və İslamə irşadi vəzir de Seyid Abbas Salehi sərdarəti İroni məşhurə mədəniyyət və nəcuməsənətə xadimono ibarət numayəndə heyət bə Boku səfər bəkarde. Im rujonədə muştərəkə İron-Azərbaycanə filmi kəşemoni bino bənon. İroni Mədəniyyətə Mərkəzi sədr Əsğər Farsi mətbuatə konfransədə votəşe ki, ım filmi i hissə Boku - İçərişəhər məhəllədə, diqər hissə isə İronədə bəkəşen. Çey sujet məhəbbətə mevzuədəy.

Əsğər Farsi ımən ğeyd kardəşe ki, Az.R mustəğil bıe bəpeştə çəmə devləton arədə siyasi, iğtisadi, mədəniə həmkarətiə əlağon rujbəruj inkişaf kardedə. Çimiən səbəb əve ki, çəmə xalqon bə yəndı har cəhəto obastin, çəmə devləton arədə marzon əməni yəndıku co eğande əzıni. Mədəniyyətə vəzarəton mədəniə əlağon həniən inkişaf karde ro muhummə qəmon şododən. Ey həmən əlavə kardəşe ki, çəmə məmləkəton arədə tələbə mubadilən sorbəsor inkişaf kardedə. Isət 2 həzo nəfər ironıjə tələbə Az.R-ədə təhsil sedə. Şımə tərəfədən xeyli tələbə İroni muxtəlifə universitetonədə handedə.

Mədəniyyətə rujon dı qılə keşvəri arədə mədəni sahonədə həmkarəti həniən inkişaf bəkardovne, İroni mədəni nailiyyəton bə Az.R cəmiyyəti oşno beədə muhummə rolış bəbe.