Bə pambə hion zəhər kii peşandəşe
Az.R pambə hionədə fəhləon kullən zəhrəlud bıə hadison dəvom kardedə. "Azadlıq.info" iyunə manqi 23-minə ruji Sabirabad şəhrestani Muğanqəncəli diy pambə hiədə 17 nəfəri zəhrəlud bıe həxədə xəbə pevolo kardışe. Çəvonədə 4 nəfəri hol qıvonin bıe səbəbiku bə Şirvan şəhəri mərizxonə bardəşone.
Jiqo hadisə iyuni 21-minə ruji çe İmişli Aranlı, iyuni 20-ədə Yevlax şəhrestani Hacımahmudlu, Tərtəri Xoruzlu dion pambə hionədən vağeə bıə. Xeyli pambəvonə fəhlə de zəhrəludə diaqnozi bə mərizxonəon dəğandəşone.
Çe iyunə manqi 10 -minə rujiku tosə ısət 7-minə səfəy ki, pambəhionədə ko kardə fəhlon zəhrəlud bedən. De ım hadison əlağədar Respublika Sər Prokuratura cinayətə koon bino kardəşe. 5 nəfər dəstqir kardəşone. Çe Di Təsərrufati Vəzarəti Fitosanitariya Nəzarətə Xidməti rəis Camal Ğuliyev çe vəzifəku beğanədşone.
Im Vəzarəti Mətbuatə Xidmətiku bə "Qaynar.info" sayti məlumat doəşone ki, bə ım hadison dair təhğiğat bino bıə, əlağədar təşkilaton bı koy cəlb kardəşone. Çanə ki, təhğiğat bə orəx rəsə ni, ım hadison əsıl səbəbi barədə konkret fikir vote nibəbe.
Bə di təsərrufati dair təhlilqər Vahid Məhərrəmovi bə Meydan TV votəşe ki, Soveti vaxton kimyəvi pereparaton ısətnəsən vey istifadə bedəbin, əmo jıqo hadison vağeə bedənıbe. Fəhlon ım cur kullən zəhrəlud bıe əsasə səbəb ğeyri-peşəkarə odəmon bə aqrar sektori səvonəti kardeədəy. Əvon Di Təsərrufat İnstituti diplom səşone, əmo bə ım sahə aid zınəyşon kame, yəni çe ım sahə mutəxəssis nin. Bı səbəbən jıqo hadison bə meydon beşedə.
