Bokuədə M.Məcidi Peyğəmbər (s) barədə kəşə filmi təğdimatə mərasim dəbəvarde

İroni yolə kino sənətkaronədə qıley, çand qılə beynəlxalğə kinofestifalon laureat çe Məcid Məcidi 2015-minə sori bə İslami Peyğəmbər (s.ə.v.s) dair kəşə şərəfinə kino - film 8 sornə zəhməti bəpeşt nəhayət ki, bə beynəlxalğə ictimaiyyəti təğdim kardışone.

Həmonə sori ım film çe dınyo bənə Rusiya, Turkiyə və həniən çand qılə məmləkətonədə numayiş bıe, bə tərəğğipərvər cəmiyyəti rəğbəti səbəb bıe. İqlə vəhhabiə şərməndə ğıvvon bey əleyh votemonon kardışone, ıştə devləton əraziədə ım filmi numayişi icazə nıdoşone.

Az.R-ədən tosə ısət çe Məcidi "Məhəmməd (s.ə.v.s) Rəsulullah" nominə ım film bə cəmiyyəti təğdim kardəşon nıbe. "İslamazəri.az" sayt xəbə dodə ki, iyunə manqi 28-minə ruji Respublikadə İroni mədəniyyətə rujon dəvardə vaxti Boku Nizami Kino mərkəzədə çe mısılmonə nəciməsənətə aləmi ım şedevr kino-filmi təğdimat mərasim dəbəvarde. Im təğdimat de M. Məcidi şəxsi iştiraki təşkil bəbe.

İroni Mədəniyyətə Rujon iyuni 27-ku tosə iyuli 1-minə ruji əhatə bəkarde. Im tədbiri çərçivədə İroni Milliə Orkestri Boku və Qəncə şəhəronədə konsert , İroni kinofilmon numayiş, Bəndər- Abbas teatrə kollektivi təmoşon təşkil karde nəzərədə qətə bedə. 

  İİR Mədəniyyətə Mərkəzi sədr Əsğər Farsi votəşe ki, ponə sori Tehron, İsfahan və Ərdabil şəhəronədə Azərbayçanə mədəniyyətə rujon dəvardin. Jıqo tədbiron çəmə xalqon arədə munasibəron həniən və hartərəfin inkişaf karde roədə vey yolə əhəmiyyətış heste.