Boku hokuməti təməku məhsulon səpe aksizə verqi ziyod kardışe

Prezident İlham Əliyevi bə Respublika Verqi Məcəllə əvəzon təsdiğ kardəşe. Həmonə əvəzon bə təməkuə məhsulon aksizə verqi 2-3 ğat vey karde nəzərədə qətedə və iyulə manqi 1-minə rujiku bə ğıvvət peşedə. Dəvardə həftədə devləti təbiiə monopolistə muəssuison məmləkətədə bərğ, ğaz və ovi ğıymətonən boho karde barədə təklifon bə nav doəşonbe.

Bə Devlətə Statistika Komitə rəsmi məlumati əsasən dəvardə manqədə məmləkəti vıjoronədə ərzaği - qujd, ruən, moğnə çay, kofe, ğəndi ğıyməton boho bıən. Moğnə ğıymət 55% ros bıə, bə 20 kopik rəsə. "Turan" İnformasiya Ağentiyyət ğeyd kardedə ki, Az.R-ədə bə moğnə i sornə tələbat 2,8 milyard ədəde, əmo keşvərədə çimi 53%-i ğədərədə moğnə istehsal bedə. Bı səbəbən vıjoronədə moğnə defisit bə çey ğıyməti boho bıe səbəb bedə.

Ekspert Qubad İbadoğlu "Yeni Musavat" rujnomədə nıvıştedə ki, ərzağə məhsulon boho bıe səbəb ğıyməton vıjoronədə de tələb və təklifi arədə nisbəti ne, ım ticarəti çe monoroliston dast`ədə beyədəy. Bimi ro əv ruəni ğıyməti misal vardedə. Votedə ki, ponə sori dekabrədə Naziron Kabineti bə keşvər idxal kardə ruəni səpe kemruqə rusum 3 ğat saru eğandışe. Əmo ım nəinki bə çey ğıyməti saru eqınie səbəb nıbe, əksinə vıjoronədə ruəni ğıymət tikiən boho bıe. Im fakt Respublika ərzağə vıjori çe monopoliston dastədə bıe, ğıyməton çəvon tərəfo muəyyən karde nişon dodə.

İbadoğlu həmən ğeyd kardəşe ki, çe jıqo vəziyyəti vəy se ro  Antiinhisar və bə İstehlakə Vıjori Nəzarət Devlətə Komitə heste. Əmo əv bı barədə hiç qıley tədbir vindedəni.