Hokuməti qıley dini fəalşən bə zindon dəğande
Boku hokumət bə dini fəalon munasibətədə ıştə şərməndə siyasəti dəvom kardedə. Bərdə rayoni məhkəmə iyuni 29-minə ruji bə hurmətmandə dindar və xeyriyyəçi Elşən Abbasovi 2 sor 6 manq zindonə cəzo elan kardışe.
Polisi əv ponə sori oktyabrə manqədə de ım ittihami dəstqir kardəşbe ki, quya çey avtomobilədə 1,9 ğram nəşə, qıley həfttir, qumbara və çəxo bə oşko bekardəşebən.
"Vətənuğrunda.az" sayt xəbə dodə ki, ım çe Elşən Abbasovi 2-minə məhbəsiyyəte. Əv 1-minə kərə 2011-minə sori mayə manqi 6-ədə Təhsilə Vəzarəti vədə bə hicabi ğədəğə etiraz kardə aksiyadə iştiraki qorə 2 sor zindonə cəzo kəşəşbe. Zindono beşe bəpeşt ıştə dini əğidə və mubarizəku dənıqarde, bə Mısılmonon İbemonə Hərəkati uzv bıe, Taleh Bağırzadə ideyon təbliğ əkey. Muxalifəti dəvuniə mitinğonədən həmişə iştirakış əbi, Bərdə rayonədə xeyriyyə tədbiron dəvordıni, bə beçizə ailon koməkəti əkardi.
Məhkəmədə Elşən Abbasovi bə çey əleyh ittihamon rədd kardəşe, əvonış şər və bıhton zınə. Çey nezə odəmonən ım ittihamon soxtə və pesoxtəyo ibarət bıe təsdiğ kardedən. Votedən ki, Elşəni bə zindon dənoe əsasə səbəb əve ki, əv Mısılmonon İbemonə Hərəkati uzv, çe Taleh Bağırzadə həmməslək və bə çey ideyaon tərəfdar, Bərdə rayonədə jolə hurmət və nufuzi soyb bıe, Abbasovi ım insoniə keyfiyyəton əvış bə hokuməti nəzarət, təhdid və təzyiğon hədəf kardəşbe. Bı səbəbən əvşon çe cəmiyyətiku təcrid karde.
