Gəncə İcra hakimiyyəti sərdar de qolulə jeşone

İyulə manqi 3-ədə de hanqomi vaxti saat 8-ədə Qəncə şəhəri İcra Hakimiyyəti sərdar Elmar Vəliyev de qolulə jeşone. Bey ım həmlə kardəkəs 1983-minə sori Qəncədə moəo bıə. Əv Moskva şəhəri sakin, Rusiya şəhrıvand Yunis Səfərove ki, çe polisi tərəfo dəstqir kardəşone.

Im hucumi nəticədə Vəliyev və çey muhafizəəkə Aşbazov Ğasım zəxmin bıən, əvonşon bə mərizxonə dəğandə.

Sosial şəbəkonədə ım hadisə bə yolə ajiotaji səbəb bıə. Xalqi çe ım ıcra sərdari zulmiku bə zinhor ome, çey bə dini fəalon divon qəte, Qəncədə dini mərasim və ayinon dəvunie imkan nıdoe əhaliku bey yolə nifrət bə əməl vardəşbe. Bı səbəbən sosial şəbəkə yuzeron Yunis Səfərov çe Azərbaycni milliə ğəhrəman elan kardışone. Im silahinə həmlə əsil səbəbi barədə jıqo qıley fikir heste ki, Elmar Vəliyevi çe Yunisi hovə de biədəbə dıjmoni təhğir kardəşebən.

De ım hadisə əlağədar Az.R Prezidenti koməkkar Əli Həsənovi məlumat doəşe ki, ım hərəkət kriminal xarakterinə qıley əməle, Respublika huğuğə muhafizə orğanon sərvaxt, cinayətkar dəstqir kardəşone, çe zərərdidon jimoni xilas karde roədə mərizxonə doktoron səmərəninə tədbiron vindəşone. Sosial şəbəkə və muxalifə KİV-ədə bımi bənə ajiotaji qıley ranq doe əbəsə koe.

Respublika huğuğə muhafizə orğanonən bahəm məlumat doəşone ki, de ım hadisə əlağədar cinayətə ko bino bıə, çe prezidenti şəxsi nəzarəti jitono muvafiğ tədbiron bə vırə rosnidən.