Bə Yunis Səfərofi işqəncə doəşone

Məlume ki, iyuli 3-ədə Yunis Səfərov nomədə qıley Qəncəvoji bə şəhəri İcra Hakimiyyəti sərdari silahinə həmlə kardışe. Çimi nəticədə həmonə sərdar və çey muhafizəəkə de qolulə zəxmin bin. Çey maşkinə ruji sosial şəbəkonədə Yunisi işqəncəninə foto şikil pevolo kardışone. Im Respublika Mass-mediadə bə etirazon səbəb bıe.

Meydan TV xəbə dodə ki, Sər Prokuratura və Daxili Koon Vəzarət bə Səfərovi işqəncə fakt təkzib kardəşone, votəşone ki, istintağə prosesədə çey həmə huğuğon təmin bıən. Əmo DKV mətbuatə xidməti rəis Ehsan Zahidovi həmonə foto çe Səfərovi şikil bıe təsdiğ kardəşe, çey sifətədə işğəncə rizon barədə votəşe ki, quya polison Səfərovi dəstqir kardeədə ey muğavumət nişon doəşe, bə səbəbən həmonə xəsarəton səşe.

Huğuğə mudafiəkar Oqtay Quləliyevi isə fikir jıqoe ki, Yunis Səfərovi işqəncəninə şikili pevolo kardeədə dı qılə məğsəd heste. Tosə ısət "Bandotdel"ədə, zindonxononədə bə siyasi və dini məhbuson kullən işqəncə doe fakton bə cəmiyyəti məlume. Əmo çəvon barədə hiç qıley foto - şikil bə meydon bekardəşon ni. Isət Səfərovi şikili bə cəmiyyəti nişon doeədə hokuməti məğsəd əhali torsonieye, bəvon vote pidəşe ki, bə məmuri həmlə kardəkəsi ağibət jıqo bəbe.

Diminə məğsəd ım bıe bəzıne ki, qaspuən hokuməti daxilədə kali qrupon vəziyyəti həniən qıvonin, əhali arədə noroziəti ziyod karde pidəşone, bımi ro jıqo şikilon pevolo kardedən.

Quləliyevi ımən əlavə kardəşe ki, Yunis Səfərovi nezə odəmonədə i ğism dəstqir kardəşone, diqərion polisi təğibiku niyo bıe məcburiyyətədə mandən.

Sosial şəbəkonədə bə Yunis Səfərovi dastək anədə zumande ki, kali qruponədə çey ictimaiyə mudafiə komitə soxte təklif kardedən.