Az.R-ədə məmuron rışvəxorəti vəy ki sənine?

Az.R iğtisadiyyati çe behraniku beşe nızne səbəbonədə qıleyən vəzifədarə məmuron rışvəxorətie. Behrani dəvom kardə ım 2 sor kafi ğədər vaxte ki, İlham Əliyevi hokumət məmləkətədə de rışvəxorəti ğəti mübarizə bəbey, demən de istehsali məşğul bə fermer və biznesmenon bemaneə ko karde imkan bədey ki, məhsul istehsali miğdar ziyod bıbo, iğtisadiyyat inkişaf karde bızıno.

Əmo çoko İlham Əliyevi bə rayonon təyin kardə icra hakimiyyəti sərdaron de fermeron ğarəti məşğul bedəbin,  ısətən əvon ım hərəkəti dəvom kardedən. "Azadlıq.info" bə "Milliyol.az" sayti istinadən Hatəçolə rayoni İcra sərdar İsmayıl Vəliyevi de fermer Rafil Həsənovi sərqozəştonku nıvıştəşe.

Rafil Həsənov votedə ki, 2013 -minə sori 500 hektar  zəmini  15 sori müddət bə icarə peqətəme. Bə vaxti rayoni icra sərdari tələb kardə məbləğədə rışvə bey dome ki, çımı sənədon təsdığ bıko. Isət heyvandarə kompleksım onoə. 300 qılə dıjdəsə, 1500 hırdəsə heyvon oqətedəm. 17 qılə ailə çımı bı təsərrüfatədə ko kardedə, ıştə xeyzoni təmin kardedən. Bı 3 sorədə əmə çanədə zəhmət kəşəmone, jıqo qıley nümunəvi təsərrüfat bə əməl vardəmone. Isət  icra sərdar Vəliyev çımıku 40 həzo mənot rışvə tələb kardedə. Bə mı rıjd omedə ki, ım məbləği bey nıdom, əv çımı təsərrüfsti dastom bəse, bədo bə co kəsi.

Bı hənqomədə marağinə cəhət əve ki, Rafil Həsənov şəxsən şə bə Pezident Adminstrasiya, ıştə şikayət bəvon rosniəşe. Əyo bey votəşone ki, de im məsələ əlağədar tədbir bəvinden. Çəvon vində tədbir çımədə ibarət bıə ki, ısət İcra hokuməti odəmon Həsənoviku tələb kardedən ki, çey zəmin həvatəşone, bə qorə ıştə fermon oçıno, heyvononən bəhavato.

İlham Əliyev hokuməti bardə jıqo xərob kardə siyasəti nəticəy ki, ısət bo əhali zəruri ərzağ məhsulon əksər hissə çe xarico de valyuta hıridən. Imən bə valyuta defisiti, bə mənoti devalvasiya, ərzaği ğıyməton boho be, əhali quzərani rujbəruj qıvonin be səbəb bedə.