Huğuğə mudafəkaron Boku hokuməti ğeyri-ğanuniə hərəkətoku norohətin

Az.R-ədə Siysiə Məhbuson Huğuğon Mudafiə Mərkəzi iyuli 11-ədə mətbuatə konfrans dəvuniəşe. Bı barədə "Arannevvs.com" sayti xəbə doəşe. Im təşkilati sərdar Oqtay Guləliyevi votəşe ki, hokuməti ğeyri-ğanuniə dəstqir və repressivə hərəkəton bə huğuğə mudafiəkaron norohəti səbəb bedə.

Orəxnə həftədə məmləkətədə vağeə bıə hadison bəpeştə polisə ğıvvon xeyli miğdarədə şəhrıvandon dəstqir kardəşone. De Qəncə hadison əlağədar rəsmi mənbon 52 nəfəri bə zindon dəğande təsdiğ kardedən. Əmo ğeyri-rəsmi xəbonədə çəvon miğdari 100 nəfərisən vey nişon dodən və ım tədbiron polison tərəfo hələən dəvom karde votedən. Hətto sosial şəbəkonədə Yunis Səfərovi mudafiə kardəkəsonən həmonə dəstqir bıəkəson arədə hestin. 4 qılə sayt blokşon kardə, bə çand qılə sayti rəhbəriyyəti əleyh cinayətə ko bino kardəşone.

Oqtay Quləliyevi iyuli 10-minə ruji Qəncə şəhərədə mitinqi vaxti polison ıştəni şəkbəlu barde ğeyd kardəşe, votəşe ki,  çəvon hərəkətonədə muəmmon veyin. Çoko bedə ki, Bokuədə icazəninə mitinğədə polisi muhafizə anədə ğoym bedə ki, har kəsi dastəvəno kardedən, əmo Qəncə şəhərədə beicazəninə mitinğədə polison bə muhafizə beəbjor beşedən, mitinqə meydoni muhafizə təşkil kardedənin, nəticədə cinayətkarə odəmon 2 nəfər barzə mənsəbinə polisə zabiti ğətl karde ro imkan bə dast vardedən. 

Zindonxonədə bə siyasiə məhbuson işqəncə doə əməlon hələən dəvom karde həxədə həmonə məhbuson nezə odəmon məlumat doəşone.  Hokuməti rəsmiyon isə daima jıqo fakton bə həşə jedən.