Nardarani faciə axırnə məhkəmə bə orəx rəse

Boku Qonə Cinayəton Məhkəmə de Nardarani faciə əlağədar bə axırnə 2 nəfər məhbusi - Əbulfəz Bunyadovi və Elxan İskəndərovi hukm elan kardəşe. Bunyadov bə 15, İskəndərov isə bə 14 sornə zindonə cəzo məhkum bin. Əvon har 2 kəs ittihamon rədd kardışone, şər və bıhtono ibarət bıe votışone.

Məhkəmə bekardə  ım hukm çe Az.R ədliyyə sistemi çanədə beysur, beəmon və insoniyyətiku diəro qıley təşkilat bıe ikərən bə cəmiyyəti oşko kardışe. Çunki Əbulfəz Bunyadov 2015-minə sori noyabri 26-ədə polisə ğıvvon Nardaranədə dəvuniə əməliyyati vaxti de polison ğandə çand qılə qolulə zəxmin bıəbe. Çimi nəticədə əv şikəste, hərəkət karde zınedəni.  Bə məhkəmə de doktori nəzarəti xərəki səpe vardedəbin. Xərəki səpeyən əvşon bə zindonxonə barde. Əv ıştə cəzo 3 sori Ğobustani sərpuşə zindonxonədə dəvuniənine.

Vəkil Yalçın İmanov "Vətən  uğrunda" saytədə nıvıştedə ki, bə Əbulfəz Bunyadovi elan bıə hukm devləti ıştə şəhrıvandiku ğisas seye, çey intiğamə təşnəy, hakim və prokuroron ıştə vijdaniku məhrum bıe qıley əloməte.

Mısılmonon İbemonə Hərəkati sədr Taleh Bağırzadə zindonxonəku bə hokuməti muraciətən votəşe ki, az çəvonku har çi çəş kardedəbim. Əmo hərəkət imkaniku məhrum bıə qlıey şikəstə odəmi məhkum karde çəş kardedənıbim. Im ğəror çe insonətiku bə kəno qıley əməle, ıştə vijdani sıbık karde ro Əbulfəzi ım hokmi əvəz bıkən.

Nardarani faciə məhbus Abbas Huseyniən çe zindono bı məzmunədə qıley muraciət vığandəşe, votəşe ki, bə Hacı Əbulfəzi ım hokum insonəti bə lınqon ji dənoe, beinsofəti kulminasiya noğtəy, ey bə marde təhrik kardeye. Qirəm zindonxonədə çey umr bə orəx bırəso, çimi məsuliyyət hokuməti qiyədə bəmande.