İİR və Az.R arədə həmkariəti əlağon inkişaf kardedə

İİR de Az.R arədə iğtisadi və mədəni əlağon şe-şe inkişaf kardedə. Bi rujonədə İroni Səhiyyə vəzir Seyid Həsən Ğazizadə bə Boku 2 rujnə rəsmiə səfər ome.

"Arannevvs. com" xəbə dodə ki, İroni səhiyyə və dəvo istehsali sahədə bə dast vardə muvəffəğiyyəton imkan dodə ki, Az.R əhali bə İroni tibbi xidməti və dəmonon etimad nişon bıdo və çeyku foydə peğəto. Seyid Həsən Ğazizadə de Prezident İlham Əliyevi vindemon kardəşe. Votəşe ki, çəmə hokumət de Az.R səhiyyə və dəvocat istehsali sahədə həmkarəti karde hozoe. Im həmkarəti 2 qılə məmləkəti xalqon rifah və firəvanəti ro çokə imkanon bə miyon bəvarde.

İ.Əliyeviən ğeyd kardəşe ki, əmə İroni tibbiə mutəxəssison bə Azərbaycani təhsilə muəssison dəvət kardedəmon, de İroni səhiyyə sahədə bahəmə proyekton icra karde ro ey bə hokuməti uzvon lazımi dəsturon doəşe. Prezidenti Boku ətrofədə dəvoçat istehsal kardə zavodon inşa barədə votəşe ki, bı koədə mevcud maneə və problemon çe arə bardəşone, nezə vaxtonədə ım zavodi inşa bino bəkarden.

İyuli 16-ədə İİR Sər Kemrukə İdarə rəis Frud Əsğəri və Az.R Devlətə Kemrikə Komitə sədr Səfər Mehdiyev de 2 qılə devləton arədə kemruqə həmkarətion inkişaf kardovnie məğsədi İroni Culfa şəhərədə didor dəvuniəşone, sığorta problemon, elektronə informasiyaon mubadilə, kemrukə protokoli ğaydəon sodə karde və həniən kali məsəlon barədə fikir mubadilon bardəşone.