Az.R huğuğə mudafiəkaron bə İ.Əliyevi muraciət vığandəşone

Qəncə hadison Az.R cəmiyyət və çey navğədəmə ruşinəfikron norohət kardə mevzuonədəy. Dəvardə rujonədə i qrup huğuğə mudafiəkaron iclas dəvuniəşone, de Qəncə hadison əlağədar hokuməti vədə "səhih məlumat doe" tələb bə nav doəşone.

"Siyasiə Məhbuson Mudafiə Mərkəzi" uzv Əvəz Zeynallı votəşe ki, hokumət adi kriminalə hadisə dıjd kardedə, çeyku bo repressiyon bənə vonə istifadə kardedə, ıştə işqəncə aparati bə ko dənodə. Qəncədə məmuron ıştənbəsəti, bə şəhrıvandon divon qəte barədə Respublika mətbuatədə mutəmadi xəbon dərc bedəbe. Hokumət ım curə hərəkəton vəy se, ım hadisonku nəticə bekarde əvəzi, hamsuə devləton qınokar zınedə. Devləti usuli-idarə islah bənine.

"Turan" İnformasiya Aqentiyyəti sərdar Mehman Əliyevi ğeyd kardəşe ki, muasirə devr`ədə sosial şəbəkon informasiya pevolo kardə əsasə vasitonədə qıleye. De sosial şəbəkon vasitə məlum bıe ki, xalqi bə Elmar Vəliyevi nifrət anədə zumande ki, bə Yunisi hərəkəti bəraət doşe.  Im şəbəkə fəalon təğib karde ğeyri-ğanuniə əməle.

İclasədə iştirakəkon bə Prezident Əliyevi muraciət ğəbul kardışone, bə çey nəzə rosnişone ki, rayononədə icra hakimiyyəti sərdaron de əhali bəd rəftor kardedən, bı cur əməlon orəx doe lozime.

De Qəncə hadison əlağədar polisi iyuli 16-ədə 4 nəfərşən bə zindon dənoə. İm xəbə bə AZƏRTAC-i istinadən Meydan TV pevolo kardəşe. De ım hadison əlağədar dəstqir bıə odəmon miğdar ısət 30 nəfərisən dəvardə.