De Qəncə hadison əlağədar repressiya tədbiron dəvom kardedə

İyuli 21-minə ruji Az.R Sər Prokuratura, DƏX və DKV mətbuatə xidməton bahəm qliey məlumat bə cəmiyyəti nəzə rosnişone. "İslamazeri.com" ım məlumati barədə xəbə dodə ki, Respublika huğuğə muhafizə orğanon dəvuniə əməliyyatə tədbiron nəticədə de Qəncə hadison əlağədar həniən 8 nəfər dəstqir kardəşone.

Huğuğə muhafizə orğanon doə həmonə məlumatədə həmən ğeyd kardedən ki, iyulə manqi 20-ədə bə devlətə orğanon məlum bıə ki, çe Yunis Səfərovi nezə həmməsləkonədə qıley Bağırov Anar İslami zoə Binəqədi rayoni Xocəsən ğəsəbədə niyo bedə. Ey dəstqir kardə əməliyyatədə bə polisə ğıvvon silahinə muğavimət nişon doe səbəbiku polison əv kıştəşone. Çey səpe qıley "Makarov" markaninə həfttir bə oşko bekardəşone.

Bə devləti ım orğanon doə rəsmiə məlumaton əsasən tosə ısət polisə ğıvvon de Qəncə hadison əlağədar 78 nəfər dəstqirşon kardə, 2 nəfər kıştəşone. Əmo huğuğə mudafiəkaron votedən ki, de ım koy əlağədar bə zindon dəğandə odəmon miğdar 100-sən dəvardə.

Siyasiə təhlilqəron çe Əliyevi hokuməti jıqo de odəm kışte muşayət bıə repressivə hərəkətonədə vəomə Məhərrəmə manqi mərasimonədə dini fəaliyyəti bə kam karde, əzadarəti mərasimon icra vəy se ro bənə qıley təhdidi və bə dini navğədəmon bənə çəşnavi ğıymət dodən.