Hokuməti ictimai nəğliyyatiku istifadə ğıyməton boho kardışe

Az.R devlətə Tarif Şura ictimai nəğıiyyatiku istifadə ğıyməton 50 % boho kardışe. Avğustə manqi 1-ku şəhəron daxili avtobus və metroku istifadə ğıymət 30 kopik, şəhər ətrofi nəğliyyato istifadə ğıymət 30 kopikiku tosə 90 kopik muəyyən kardəşone. Rayononarə nəğliyyati istifadə ğıymətonon 50% ziyod kardə bıə. Çimi həftəyi bə nav poiyzonədən qıyməton boho kardəşonbe.

Hokumətpərəstə ğıvvon ım hərəkət bəqəm kardəşone. Tojə Azərbaycanə Partiya Cıvonon Təşkilati ıştə "fasebook" səhifədə nıvıştəşe ki, çəmə insonon ğıyməton ım ziyod bıe vey vaxtbe ki, bə çəşbin. Milli Məclisi deputat Rustəm Xəliloviən bə "Olkə.az" sayti votəşe ki, Tarif Şura ım ğərorədə ğeyri-adi jı çi ni, ım normal qıley əməle.

Muxalifəti isə hokuməti ım hərəkət tənğid kardəşe. Cəmil Həsənli votəşe ki, nəğliyyatədə ğıyməton boho karde iştisadi izah inşe. Hokumət ımi jıqo izah kardedə ki, postsovetə devləton arədə Az.R-ədə ictimaiə nəğliyyatiku istifadə ğıymət ən erjonə səviyyədəy. Əmo ımiən vote lozime ki, həmonə devləton əksəriyyətonədə minimum məvacib çəmə keşvərisən 2-3 kərə veye. Həmonə keşvəron ictimaiə nəğliyyatonku istifadə kardeədə bo pensioneron, əlilon, tələbon və bənə bımon becizə sosial təbəğə odəmon ro qozəşton mevcudin. Az.R -ədə isə jıqo qozəşton xeyli vaxte ki, ləğv kardəşone. Hokumət pensiyaon 10%, nəğliyyati bileton ğıyməti isə 50% ziyod kardedə.

"İslamazeri.az" sayt dəvardə manqiku etibarən Estoniya 11 qılə reqionədə ictimai nəğliyyati bepulə istifadə bino bıeku xəbə doəşe. Im sayt eyən ğeyd kardedə ki, ım məmləkəti paytaxt Tallinədə 2013-minə soriku şəhəri nəğliyyatonku istifadə bo şəhrıvandon və xariciə turiston həvoye.

Çe Estoniyasən təbii sərvəton çand ğat qəncin bıə çe Az.R hokumət isə boştə sodə zəhmətkəşon ictimai nəğliyyatiku istifadə xarci ikərədə 50% boho kardedə