Az.R-ədə iğtisadi tənəzzul dəvom kardedə

Az.R Naziron Kabineti şəxsi avtomobil və mobil ləvazimaton ğeydiyyati ro devlətə rusumon məbləğ 6 kərəku tosə 30 kərə ziyod kardışe. Çimi ruji bə nav ictimai nəğliyyatiku istifadə ğıymətonən 50% ziyod karde iğtisadi təhlilqəron arədə jıqo qıley ray bə əməl vardəşe ki, hokuməti iğtisadiyyati inkişaf karde barədə votəyon bə həğiğəti muvafiğ ni.

İğtisadi tənəzzul dəvom kardedə, hokumət budcə pur karde ro yekanə roy ğıymət, rusum və verqion ziyod kardeədə vindedə.

"Azadlıq.info" i sorədə məmləkəti bank sektori aktivon 6,8% kam bıe barədə nıvıştəşe. İm tənəzzuli bankon kredit siyasətşən əhatə kardə, əyo tənəzzul 13% təşkil kardəşe. Əhali bə bankon noə depoziti məbləğ 70% saru eqıniə. İğtisadşunason bankon ım curə tənəzzul karde əsasə səbəbi məmlkəti iğtisadiyyati həcmi sorbəsor kambeədə vindedən.

İğtisadi tənəzzuli keşvəri de ərzaği təmin kardeyədə əsasə monopolistə şirkət "Azərsun Holdinq"şən əhatə kardə. Azadi Radio xəbə dodə ki, ım şirkəti mənfəət bə ponə sori nisbətədə 3,7% kam bıə. Umumən isə ım  holdinq orəxnə sori cəmi 27 milyon mənot xalisə mənfəət bə dast vardəşe ki, ımən bə dəvardə sori nisbətədə 19 milyon 500 həzo mənot kame. "Azərsun"i rəsmiyon çimi səbəbi izah kardedənin.

Prezident İlham Əliyevi isə Lekbatan ğəsəbədə de muharibə əlilon və şəhidə ailə numayəndon vindemonədə votışe ki, vəomə sor çəmə surətinə inkişafi sor bəbe,  maliyyə imkanımon həniən inkişaf bəkarde.