Huğuğə mudafiəkaron Qəncə hadisə məhbuson vəziyyətiku norohətin

Az.R sər prokuror Zahid Qaralovi məlimat doəşe ki, de Qəncə hadison əlağədar tosə ısət 61 nəfər dəstqir bıə, 4 nəfər polison kıştəşone, 13 nəfərən axtarışədəy.

Siyasiə Məhbuson Mudafiə Mərkəzi koordinator Oqtay Quləliyev bə "Kavkazskiy uzel" sayti parseşi cəvobədə votəşe ki, de Qəncə hadisə əlağədar dəstqir bıə odəmon istintaği qardış çe cəmiyyətiku niyo kardə bedə. Im vəziyyət huğuğə mudafiəkaron xeyli norohət kardedə. Jurnalist Anar Məmmədovi ım problemi həxədə nıvıştışe, bı səbəb əvşon prokuraturadə de istintaği materialon bə cəmiyyəti rosnie vonə ittiham karde. Quləliyevi ğeyd kardəşe ki, çəmə dastədə jıqo qıley ğeyri-rəsmi məlumat heste ki, de ım hadisə əlağədar 200 nəfərisən vey odəm oqətəşone, çəvonədə kali kəson vadoə bıə, kali kəson inzibati cəzo səşone, əmandəyon bə cinayətə məsuliyyət cəlb kardəşone ki, çəvonən əksər ğism dindarono ibarəte. Im odəmon kom zindonədə bıe barədə bə çəvon əvlodon məlumat, bə vəkilon vindemoni imkan nıdoe əməni niqoran kardedə. Bə dəstqirbəkəson əvlodon anədə tars omən ki, əvon hətto bə huğuğə mudafiəkaronən hiç qıley məlumat doe curət kardedənin.

Quləliyevi əlavən votəşe ki, Avropa və Rusiyadə jimon kardə bə 30 nəfəri dairən cinayətə ko bino bıə və axtarış elan kardəşone.

Diqər huğuğə mudafiəkar Əliəsqər Məmmədli polisə ğıvvon tərəfo axtarışədə bıə odəmon tələf karde barədə votışe ki, "Polisi həxədə ğanun" silahinə muğavimət nişon doə odəmi de neytral, və ya bizərər karde məğsədi de qolulə zəxmin karde icazə dodə. Əmo Respublika huğuğə-muhafizə ğıvvon bardə əməliyyatonədə 4 nəfəri tələf karde nişon dodə ki, çəvon məğsəd ım odəmon bizərər ne, məhv kardeyebən ki, rəsmiə məlumatədə əvon ıştənən ım fakti təsdığ kardedən.