Tırkiyədə Amerkə elektronik məhsulon ğədəğən be.
Tırkiyə prezident ım kişvərədə Amerkə elektronik məhsulon təhrim beyku xəbəş do.
Bə Anatoli aqentiyəti raporti əsos, Rəcəb Təyyeb Ərdoğan, zinə Ankaraədə təkidış kardə, Tırkiyə çimi bəpeşt iyən Amerkə prezident Donald Trumpi ğeyri məntıği və beağılətiku iğtisodiyə siyosəton muğavilə karde xoto de valyutə varid kardə məhsulon, ıştən istihsal bəkary və bə co kişvəron ixroc bəkarde.
Ərdoğande Trumpi bə Tırkiyə zidd bıə iğtisodiyə siyasəton de hıç ağıl və məntıği mıvofiğ zınəş nıbe iyən votışe: Amerkə rəsmi şəxson meydonədə bə Tırkiyə zidd ıştə tələbon təhmil və icbor kardeyku numid bey bəpeştə ısət bə ıştə tələbon rəse xoto hərbi ğıvvə, ictimaeyi iyən siyosi bestabil əkə amilonku bənə siloh istifodə kardedən.
Tırkiyə prezident təsdiğış kardə, Ankara həmonə iğtisodiyə fəalonku ki Tırkiyədə investsiya niyyətışon bıbu, hər zəmoniku vey istiğbol bəkarde.
Təjədən Amerkə iyən Tırkiyə miyono rabitəon, muxtəlif məsələon iyən illəton əcumlə: Suriyə şimalədə Mənbəc steratejik plani barədə tırkiyə iyən Amerkə ixtilofon, Fəthullah Quleni bə Tırkiyə oqordıniye barədə Vaşenqtoni imtino karde, Tırkiyədə bə cəsusi mıttəhəm bıə Amerkəvıjə kişiş Andre Brunson ozod nıkarde, Amerkə tərəfiku Tırkiyə ədliyyə və kişvəri vəziron təhrim bey iyən bə Amerkə Tırkiyə pulo və əlminiumi varid bey tarifi 2 bərobər bey xoto siyo bəy iyən bə yande qıniyə.
