Az.R-ədə benzini ğıymətən boho kardışone

Avğustə manqi 19-ku bəçıton Az.R-ədə 95 markaninə benzini ğıymət bə 1 mənot 50 kopik, 98 markaninə benzini ğıymət isə bə 1 mənot 60 kopik ros kardışone. Tosə ısət ım marka sutemonon ğıymət bə 1 mənot 25 kopik və 1 mənot 60 kopik bıe.

Bəzi sayton Aİ-92 benzini ğıymətiən 90 kopikiku bə 1 mənot ros bıe nıvıştəşonbe. Taarifə Şura bə “Yenicag.az” sayti məlumat doəşe ki, 92 markaninə benzini ğıymət əvəz kardə bıəni. Benzinpurkardə məntəğonədə ey bə 90 kopik həvanəninin.

İğtisadşunas ekspert Vuqar Bayramovi bə “Sputnik Azərbaycan” sayti votəşe ki, barzəoktaninə 95 və 98 markaninə benzinon bə keşvər çe xarico idxal bıedə, çey ğıymətiən Taarifə Şura, yəni hokumət ne, de ım ticarəti məşğul bıə biznesmenon muəyyən kardedən. Digər sutemonon isə məmləkəti daxilədə istehsal bedə və hokumət çəvon ğıyməti təyin kardedə. Həm mənoti, həmən nati ğıyməti beynəlxalğə birjonədə sabit mandə vaxtədə Aİ-92 benzini boho karde ro hiç qıley səbəb ni.

Əmo diqər təhlilqəron əmandənə sutemononən boho bıe proqnozi dodən. Bımi ro dəvardə həftonədə ictimai nəğliyyatiku istifadə pulon ziyod karde, həmən benzini ğıyməti hamsuə Qurcistan və Turkiyədə cəmə keşvərisən 20kopikiku tosə 40 kopik boho bıe əsas peqətedən.

İğtisadşunas Natiğ Cəfərli isə votedə ki, ocizanə fakte ki, çəmə məmləkəti 150 sornə bənə nat hasil kardə keşvəri tarix hestışe, əmo barzə oktaninə benzin istehsal karde zınedəni. Çəmə hokumət bə beməna hənəkon de milyard mənoti budcə pulon xarc kardedə, əmo keyfiyyətinə benzin istehsal kardə zavod dutedəni.