Yunis Səfərovi moə bə içtimaiyyəti muraciət vığandəşe

Yunis Səfərov iyulə manqi 3-minə ruji Qəncə İcra hakimiyyəti sərdar de qolulə je səbəbiku dəstqir bıə.

Polisxonədə çey bə işqəncon məruz mande numayiş kardə şəkilon bə dınyo cəmiyyəti məlum bıə bəpeşt Boku hokumət ıştə ım ğeyri-ğanuniə əməli eparşınie ro Yunis de qıley vəkili bə televiziya ekran bekardışe, nişon doşe ki, çey huğuğon muhafizə bedə və əv de vəkiliən təmin bıə.

Əmo Yunis Səfərovi moə Leylaxanım İsmayılova bı rujonədə bə ictimaiyyəti vığandə muraciətədə məlum bedə ki, bə Yunisi işqəncə doə əməlon hələən dəvom hestışe. Meydan TV dərc kardə həmonə muraciətədə Leylaxanım votedə ki, əvon iyuli 23-ədə de vəkil Elçin Sadığovi muğavilə dəbastıone ki, əv çe Yunisi huğuğon mudafiə bıko. İstintağə idarə isə bey bə istintaği daxil bıe xeyli muddət imkan nıdoşe. Bey de har vasitə təzyiğ bino kardışone ki, çe ım koyku imtina bıko. Sadığovi bımi rozi nıbe, çe təzyiğ və şantajonku nıtarse imkan doşe ki, avğustə manqi 13-ədə ey de Yunisi iminə kərə vindemon karde zıneşe. Sentyabri 1-ədə Yunisi Qəncə Polisə İdarə və “Bandotdelədə” bey işqəncə doe barədə bə istintaği tojə ifadə doe bəpeşt bə vəkil Elçin Sadığovi şantajon həniən zumand bin, hətto bey tars omin ki, əv çe ım koyku imtina nıko, ey bəkışten.

Mılxəs, sentyabri 6-ədə Sər Prokurori iminə muavini ğərar doşe ki, vəkil Sadığovi bə Yunis Səfərovi doə məsləhəton bə Sər Prokurori xoş nome səbəbiku Sadığov çe cinayətə koyku bə kəno noəşone və çey barədə bə Vəkilon Kolleqiya şikayət vığandəşone.

L. İsmayılova ğeyd kardedə ki, haliyədə bə Yunisi işqəncə dodən ki, əv bə Elçin Sadığovi əleyh ifadə bıdo, çey xidmətiku imtina bıkardo. Bə çey deştə ailə rabitə oqəte, ərzağ ğəbul karde səpeyən ğədəğə noəşone.