Az.R Təhsili vəziri bə tələbəon Aşura ruji əzadarətiədə iştiraki ğədəğə noəşe

Az.R hokuməti məmləkətədə bə Məhərrəmə manqi əzadarəti noə məhdudiyyəton çe ictimaiyyəti diğğətə mərkəzədəy. "ParsToday"(tolışi) sayt bə "Arannevvs"i istinadən xəbə dodə ki, Az.R Təhsili vəzir Ceyhun Bayramovi bə təhsilə muəssisə sərdaron dəstur doəşe ki, Aşura ruji tələbəon bə dərs nome vəy bısənon.

Tehroni imom-cumə Hoccətulislam vəl-muslimin Kazem Səddiği çımmə xutbədə Az.R -ədə məhərrəmə manqi əzadarəti mərasimonədə mışğılon barədə votəşe ki, xristianə devlətonədə Əhli - Beyt (ə) tərəfdaron Aşura əzadərəti bemaneə dəvunidən. Azərbaycani xalq çe ım imkaniku bəpe boçi məhrum bıbo? Bə Az.R hokuməti məsləhətım heste ki, de İmom Huseyn (ə) əzadarəkəon bə ro bışo. Aşura ləğv karde mumkun nibəbe. Umumon heste ki, Az.R hokumət ıştə xalqi bə İmom Huseyn (ə) məhəbbəti bə nəzər bəse, çey əzadarəti məhdud nibəkarde.

Ərdəbili imom-cumə Ayətullah Amili`ən dəvardə həftə ıştə cımmə xutbədə votəşe ki, çe İmom Huseyn (ə) "Az bo şımə ibrətim" sıxanon ımsor çe həmə dınyo azəriə huseyncion əsasə şuar bənine. Bıdə həmə dınyo bızıno ki, İmom Huseyn (ə) bo azəriyon əbədi qıley ibrət və numunəy, əmə de çey şə roy bəşemon. Ayətullah Amili həmən votəşe ki, azəriyon dınyo kom məntəğədə bedən bıbon bəpe bə zulm və istibdadi qiy kəc nıkon, səbarz və de izzəti jimon bıkon, "zillət çəməku diəroey" sıxanon deştə əməli numayiş bıkardon.