İrağədə azərbaycanıjə hırdənon qonə vəziyyət

Ponə sori sentyabrə manqədə İraği DAİŞ-i işğaliku azad bıə ərazi pənahqahonədə xeyli azərbaycanıjə hırdənon bə oşko beşəbe. Bə vaxti Az.R devləti rəsmiyon həmonə əğılon təcili surətədə bə vətən varde, bə çəvon nezə odəmon təhvil doe zərurət bəyon kardəşonbe. Hətto deputat Ğənirə Paşayeva həmonə pənohqoahonədə bə hırdənon qıniəbe, elan kardəşbe ki, əvoni bə vətən varde ro lozımi sənədon hozon, maddi vəsait peydo bıəcəğin əvoni bə Boku bəvığanden.

Isət məlum bedə ki, dəvardə i sori muddətədə çəvonədə cəmi 9 kəsi bə Respublika varde mumkun bıə. Əmandə hırdənon varde ro lazımi məbləğədə pul nıbe səbəbiku ım tosə ısət mumkun bıə ni.

“İslamazeri.com” sayti ım məsələ oktyabri 3-minə ruji MM-i bəşəri huğuğon komitə iclasədə muzakirə bıe həxədə məğalə dərc kardəşe. Komitə sədr Bahar Muradova votəşe ki, “ım hırdənon bə məmləkət varde bə ğədərən hosonə ko in. Azərbaycani devlət ıştə imkani çərçivədə səy nişon dodə, orzu kardedəmon ki, ım fəaliyyət ıştə səmərə bədo.”

Bə Ailə, Zənən və Hirdənon problemon dair Devlətə Komitə sədr Hicran Huseynova, Azərbaycani Hırdənon İbemoni sədr Kəmalə Ağazadə bəyon kardəşone ki, tosə ısət həniən 30 nəfər azərbaycanıjə əğılon İraği pənahqahonədə mande barədə məlumaton hestin. Devləti əlağədarə rəsmiyon de ım problemon məşğulin, de hırdənon nezə əvlodon vindemonon dəvuniəşone, bo əğılon lazımi sənədon bə səhmon dənodən  ki, əvoni bə keşvər varde mumkun bıbo.

Parlamenti kali deputatonən bə ım məsələ ıştə fikir izhar kardəşone, əmo tosə ısət devləti hiç qıley rəsmiə numayəndə həmonə hırdənon bə vətən oqırdınie ro lazımi maliyyə vəsaiti kom devlətə və ya xeyriyyə təşkilati tərəfo co karde həxədə ıştə fikir votə nişone ki, jıqo mışğıl nezə vaxtonədə konkret həll bıbo, ım beqınoə tifilon bə vətən oqordınie mumkun bıbo.