De korrupsiya mubarizə reytinqədə çe Az.R mevğe
Az.R hokumət de korrupsuya və rışvəxorəti, məmuron əhali problemon həll karde roədə və vələzolıməti ro doe vəy se ro xeyli ğəraron ğəbul kardəşe, prezident İlham Əlievi bımi ro bə çand qılə sərəncam və dəsturon ğol kəşəşe.
Imsornə sentyabrə manqədə ey fərman doşe ki, məmuron ıştə səlahiyyətonku sui-istifadə, rışvəxorəti, bə əhali xidmətədə vəlazolıməti vəy se ro məmləkəti usuli-idarədə elektron xidməton tətbiği həniən inkişaf kardovnie lozime. De ım məğsədi Prezidenti dəstur doşe ki, “Mərkəzinə elektronə İnformasiya sistem” soxt`ə bıbo.
De ım vəziyyəti əlağədar “Azadlıq.info” xəbə dodə ki, Dınyo Bank 2017-minə sori dınyo devlətonədə de korrupsiya mubarizə 100 balinə indeks elan kardəşe. Az.R de 17 bali bənə dəvardə soron ijən jinə vıronədə ğəror qətəşe. Reytinqi navonə 3 vırə Nuə Zelandiya, Finlandiya və Sinqapuri qətəşe. Qurcistan de 77, Turkiyə 49, Ermənistan de 32 bali miyonə vıronədə mandən.
OXFAM humanitarə beynəlxalqə təşkilatiən 2018-minə sori devləton Ğeyri-bərabərəti bə kam karde ro ehdədarion icra reytinğ bə ictimaiyyəti edaştəşe, bə 157 qılə devləti hokuməton ıştə ərbobə və beçizə əhali arədə maddi fərği bə kam karde ro bardə siyasəti ğıymət doəşe.
Az.R 116-minə vırədə ğəror qətəşe. Hamsuə devlətonədə Erməniston 61-minə, Rusiya 50, Qurciston 49-minə vırədə mandən. İm reytinqi lideron Danimarka, Almaniya, Finlandiya, Avstriya və Norveç devlətonin. OXFAM-i bı sahədə ən befərə sosial siyasət bardə devləton Niqeriya, Uzbəkiston, Haiti, Çad və Syerra Leone hisob kardəşe.
