Aşura ruji polison Nardaranədə 12 nəfər dindar dəstqir kardəşonebən
Bı rujonədə Meydan TV bə cəmiyyəti jıqo qıley xəbə rosnie ki, sentyabri 20-ədə Aşura ruji Nardaranədə polisi 12 nəfər dindar dəstqir kardəşebən. Bı barədə ğəsəbə sakinon votəşone ki, həmonə ruji polison əhali bə məcit daxil bıe ğədəğən kardəşone.
Sakinon bımi etiraz kardəşone ki, polison ıştə ım hərəkəti səbəbi izah bıkon. Bı səbəbən polison 12 nəfər bə polisxonə bardəşone. Çəvonədə bə 10 nəfəri 10 sutkəninə zindonə cəzo bıriəşone, ki quya əvon bə polisi muğavimət nişon doəşone. Hərçənd ki, polison ıştən hətto bə zənən və siprişon munasibətədən hoziə hərəkəton kardəşone. Polison ısətən bə çəvon ğeyri-ğanuniə hərəkəton fəal etiraz kardə odəmon kə şedən, bəvon tars dodən ki, çəvon cıvonə evladon dəstqir bəkarden, şobədon bə zindon.
Ğəsəbə siprişnədə bo 2 nəfəri – Hatəm Cəlilov və Fəxrəddin Əlxasovi de ğeyri-ğanuni silah oqəte maddə cinayətə ko bino kardəşone. Bı həxədə Daxili Koon Vəzarəti rəsmi məlumat doəşe ki, quya çəvon soədə bə mu kardə tifanq peydo kardəşone. Nardarani qıley sakini de ənənom mande şərti bə Meydan TV votəşe ki, bə ım siprişon hədə omən ki, əqər ğeyri-ğanuniə silah oqəte qıno bə qiy nıqəton, bəvədə bə çəvon əleyh 10-15 sor maddəninə ittiham bə nav bədon. Bə qorə Cəlilov və Əlxasov məcburən ım sıbıkə maddə bıhtonən bıbo bə qiy peqəte məcburiyyətədə mandən. De ğeyri-ğanuniə silah oqəte maddə əvoni tosə 3 sori bə zindonə cəzo məhkum karde bəzınen.
