İİR və Az.R kemruqə xidməti arədə həmkarəti əlağon inkişaf kardedə

İİR de Az.R sərhəd – kemrukə xidməti rəsmiyon arədə həmkarəti munasibəton şe-şe həniən imkişaf kardedə. Dəvardə həftədə Hostoro sərhəd ovaştə məntəğədə 2 qılə devləti kemriqə rəsmiyon arədə nubətinə vindemon dəvarde. İroni tərəf İroni Hostoro Kemrukə İdarə rəis Rəsul Omidi, Az.R tərəfən Azərbaycani Hostoro kemrukə posti rəis de Huseyn Məsimovi rəhbərəti kardə numayəndə heyəton təmsil kardəşone.

“Maide.az” nıvıştedə ki, ım vindemon çəmə devləton arədə sərnişin, əmtəə və nəğliyyatə vasiton sərhədiku ovaşte proseson surətin, çəvon əmniyyəti təmin karde roədə yolə əhəmiyyət hestışe. Tərəfon navonə jıqo vindemononədə ğəbul bıə ğəraron, sərhədovaştə prosesonədə mevcudə maneon çe arə barde və diqər məsəlon muzakirə kardəşone.

Bı məzmunədə qıley co didori çe İİR Biləsıvo şəhrestoni icra sərdar Həsən Ğubadi və Az.R Biləsıvo kemrukə posti rəis Ceyhun İbrahimovi arədə Ərdəbil şəhərədə sə qətəşe. “Arannevvs.com” bə İRNA istinadən xəbə doəşe ki, bı vindemonədə Həsən Ğubadi votəşe, kemruqə əlağon hevuj karde çəmə məmləkəton arədə ticari və iğtisadi munasibəton inkişafi roədə qıley fırsəte. Biləsıvo kemrukiku har ruj 6 həzo nəfər ovaştedə. Imən çəmə məmləkəton arədə etimad və səmimiyyəti nişon dodə. Ceyhun İbrahimoviən 2 qılə devləton arədə kemrukə proseson sodə karde roədə kemrukə həmkaron dəvuniə didoron yolə əhəmiyyət ğeyd kardəşe.