“İslamə mədəniyyəti paytaxt” Naxçıvanədə bə dindaron əleyh tədbiron

Boku hokuməti ıştə bə dini fəalon əleyh bardə siyasət həmişə de soxtə şuaron eparcınie cəhd kardəşe. Dəvardə sor məmləkətədə “İslamə həmrayəti sor” elan kardışone, əmo çanədə dini alim və fəalon bə zindon dəğandışone, çand qılə məçit oçınişone, Parlamenti dini ayin və mərasimon ğədəğən kardə çand qılə ğanunon ğəbul kardışe.

Isətən Az.R hokuməti Naxcıvan “İslamə mədəniyyəti paytaxt” elan kardəşe. “Azadlıq.info” orəxnə rujonədə çe Naxçıvani hokuməti bə dini fəalon təzyiğ və təhdidon həniən qıvonin kardeku xəbə doəşe. Dı qılə bıyə - Zamir və Mahir Ğasımov, Elşad İbrahimov, Rafiğ Əliyev, Cəmşid Behbudov nominə dindarə odəmon muntəzəm bə polisxonə bardedən, əvoni ıştə dini fəaliyyətiku dast kəşe məcbur kardedən.

Oktyabri 13-minə rujiən 10 nəfər dindar bə polisxonə bardəşone. Çəvonku izahat tələb kardəşone ki, boçi bə yəndı dini məzmunədə təbrikə mesajon vığandəşone. Bə sayti muraciət kardə dini fəal votedə ki, “ım çı curə islamə mədəniyyəti paytaxte ki, əməni bəştə islami əğidə əməl karde səbəbiku çand ruje ki, çe polisi təzyiği jiyono oqətedən. Çəmə xeyzonon daima təşviş və tarsi dılə`dən. Naxcıvani İslamə mədəniyyəti paytaxt elan kardedə əmə şo bimon ki, nəhayət hokumət bə əzoni ğədəğə, bə məçit şəkəson təğib və təhdidon orəx bədo, əmə ıştə dini mənəvi tələbaton asudə icra karde imkanədə bəbemon. Əmo çoko ki 15 sore Naxçıvanədə islaməfobiya bino bıə, ey ımsor həniən şiddət kardəşe. Hokumət i tərəfədə bə dini xadimon məvacib təyin kardedə, bəvon maşin dodə, diqər tərəfədə imonə əhli təğib kardedə, bəvon ıştə dini ayin və ibadəton icra karde imkan dodəni.