Mısılmonon İbemonə Hərəkati üzvon məhkəmə bino bıə

Dekabri 20-minə ruji Boku Qonə Cinayəton Məhkəmədə Mısılmonon İbemonə Hərəkati sədri müavin Elçin Ğasımov və çey 11 nəfər həmməsləkon mühakimə bino bıə. Əvon ponə sori noyabrə manqi 5-ədə, yəni Nardarani hadisə bə nav, bə hicabi ğədəğə etiraz səbəbiku dəstqir bıən. De terrorçiəti, hakimiyyəti de züy bə dast varde cəhd karde, iğtişaş eğande, ğeyri-ğanuni silah bə dast varde, cəmi de cinayət məcəllə 13 qılə maddə ittiham bedən.

Nardarani Sipirişon Şura sədr Məşhədi Natiğ Kərimovi istintağən bə orəx rəsə. Çey vəkil Əyyub Ələkbərovi bə "Report" sayti votəşe ki, Məşhədi Natiğ yanvari 7- ədə dəstqir kardəşone. Ey de cinayət məcəllə 274-minə maddə, bə devləti xəyanətədə ittiham kardedən.

Nardarani hadisə məhbuson dekabri 19-əku ənəhardə aksiya bino kardəşone. Vəkil Yalçın İmanovi bə "Azadlıq radiosu" votəşe ki, müttəhimon əvoni bə məhkəmə vanıdoe etiraz karde ro ım qəm şodoəşone.

Bə Nardarani hadisə aid məhkəmədə  de ğeyri-ğanuniə hərəkəton əlağədar Milli Şura bəyanat pevolo kardəşe.  Əyo votə bedə ki, ım məhkəmədə hokuməti çanədə cinayətə fakton oşko bin. Polisi bə şoydon, məhkəmədə iştirakəkon doə tarson hiç qıley nəticə nıdoe səbəbiku, hokumət ıştə rısvo be vəy se ro ısət məhkəmə be müttəhimon iştiraki dəvunie məğsədış heste. Bə qorə Milli Şura hokumətiku tələb kardedə ki,  bə jıqo beğanuniə və beədalətinə hərəkəton orəx bıdo.