Az.R -ədə ğıyməton boho bıe səbəb çiçe.
Az.R-ədə ərzaği mutəmadi boho bıe səbəbi barədə Milli Məclisi deputat Vahid Əhmədovi votəşe ki, bə məmləkəti vıjoron ərzağ əsasən çe İron, Rusiya və Türkiyəku idxal bedə. Im devləton valyuta orəxnə vaxtonədə xeyli erjon bıə. Bı səbəb çəğono daxil bıə məhsulonən muvafiğ ğaydədə erjon bəpe bıbo.
Əmo Respublika vıjoronədə əksinə, ım keşvəronku omə məhsulon tikiən boho həvatedən. Jıqo bohoçiəti səbəb subyektive, ım çe monopoliston ıştə mənfəəti bə zəhmətkəşon hisob ziyod kardə xislətiku bə əməl omedə.
Əhmədovi həmən ğeyd kardəşe ki, prezident İlham Əliyevi çe Respublika inkişafi "Roy Xəritə" təsdığ kardəşe. Əyo nəzərədə qətə bedə ki, 2018-2020-minə soronədə MM bəpe “Rəğabəti həxədə Məcəllə” ğəbul bıko. Əmo parlament tosə ısət ım koy bə icra rosnidəni. “Azadi Radio”ən bə yod vardedə ki, ım Məcəllə layihə dee 2006-minə sori hozoe. Parlamentədə 2 kərə müzakirə kardəşone. Əmo tosə ısət deputaton ğeyri-muəyyənə səbəbiku ey ğəbul kardedənin. Təhlilqəron hisob jıqoe ki, ım Məcəllə ğəbul bıbo, bə monopoliston mənafe qıley qıvoninə zərbə bəqınie.
Monopoliston məmləkəti ticarəti bəştə inhisari ji dənoe, çəvon zəhmətkəşon istismari şiddətin karde şəhrıvandon quzərani bə səfalətə hədd rosniəşe. Imən çəvon arədə intiharon rujbəruj ziyod kardedə. “Nur-az.com” bı rujonədə çand qılə jıqo bədbəxtə hadison həxədə nıvıştəşe. Dekabri 7-ədə Sumğayıtədə 26 sinnınə Paşayav Tamerlani ıştənış ehaştə, Qəncədə 27 sinnınə İsmayılov İbrahimi ıştənış de çaxu jə, dekabri 10-də Bokuədə 28 sinnınə Əhmədov Elşəni və 29 sınninə Hacıyev Camali ıştənışon ehaştə. Dekabri 9-minə ruji Şəmkür rayonədə i kəs bə telefon mobil rabitə ğüllə peşə, ıştən şodoe piəşe, Fevğəladə Halon Vəzarəti Şəmkür rayoni həmkaron əvşon bə zıvon qətə, bəştə ğəsd karde fikriku qordınie zınəşone.
