De Qəncə hadisə əlağədar 11 nəfəri məhkəmə bino bəbe

Im sornə iyulə manqi 10-minə ruji Qəncə etirazə aksiyadə 2 nəfər polisə zabit ğətl kardışone. De ım cinayətə hadisə əlağədar Az.R Devlətə Əmniyyətə Xidmət və Daxili Koon Vəzarəti ğıvvon məmləkətədə bə dini fəalon əleyh xeyli əməliyyatə tədbiron dəvunişone, 10-12 nəfər de silahinə muğaviməti vonə kıştışone, 77 nəfər dəstqir kardışone və ja bə axtarış doşone.

Isət çəvonədə 11 nəfəro ibarət qıley qrupi istintağ bə orəx rəsə. Bə çəvon koy Qəncə Qonə Cinayəton Məhkəmə diə bəkarde. Məhkəmə iminə iclas bə yanvarə manqi 10-minə ruj təyin kardəşone.

Əlavən vote lozime ki, ım etirazə aksiya de Yunis Səfərofi iyuli 6-ədə Qəncə icra hakimiyyəti sərdar Vəliyevi de qolulə je əlağədar dəvuniəşonbe. Çe Yunus Səfərovi istintağ tosə ısət orəxə ni. Hokumət bı barədə hiç qıley informasiyan dodəni, bə çey mustəğilə vəkilon bə təhğiğati umjən qınie imkan nıdoşe.

Ponə sori mayə manqədə Respublika zorə strukturon ərteşədə tosə 50 nəfər sərbaz və zabit de Ermənistoni həmkarəti ittihami dəstqir kardəşbe. İstintaği qardışədə çəvonədə 9 kəs  işqəncə nəticədə tələf bie. Isət de ım koy əlağədar 22 nəfər 5 soriku tosə 20 sori bə zindonə cəzo məhkum bıən.

Im 9 nəfəri tələf kardedə qınokarə odəmonədən 8 nəfər bə cinayətə məsuliyyət cəlb bıə, ısət Tərtər Hərbi Məhkəmədə cəvon muhakimə 2 manqe ki, dəvom kardedə. Bı prosesədə istintaği vaxti bə ittihambəkəson çı cürə ğeyri-insonə cəzo tətbiğ bıe barədə insoni bə dəhşət vardə fakton bə dim beşedə. Validə Əhmədova ım cürə işqəncon nəticədə ıştə coni çe dast doə Elcin Quliyevi moəy. Ey və diqər mardəkəs Mehman Huseynovi jimoni həmro Yeqanə Huseynova bə “Azadılq.info” jıqo fakton barədə qəp jəşone.  Əvon həmən votəşone ki,  məhkəməku bəştə beqıno tələf bıə odəmon bəraət doe xahiş kardəşone.