Məmuron divojə zəhmətkəşon çoko bə dast dənodən.

Az.R hokumət məmləkəti divojə əhali de koy təmin karde roədə qıley sosial layihə bə jimon dəvuniəşe. Bə divojə beçizə xeyzonon dıjdəsə heyvon, həmən kredit dodən ki, əvon ıştə quzərani təmin karde bızınon. Im ğədər xeyirxahə plani əməli nəticə vinde ro “Azadi radio” muxbir de Hostoro rayoni kali divojə zəhmətkəşon didor kardəşe.

Ruəkəno diy sakin Ellada İsmayılova bə hokuməti im proqrami umjən qıniədə çe beçizətiku xilas bıe umu kardedəbe. Bə muxbiri votəşe ki, “de bekorəti əlğədar bə Hostoro rayoni Məşğuləti Mərkəzi muraciət kardıme. Votışone bəpe kurs bahandi. Çand manq kursədə təhsil seme. Çəyo votışone bo zandəqo oqəte ro bəpe ıştı təvilə bıbo.  4 həzo mənot kredit peqətıme, təvilə onıme. Bəmı de muğavilə 2 qılə zandəqo doşone. Bə müğavilə şərton əsasən hokumət bəpe  bəmı salem, həmən ovsənə mol bədey. Bəmı votışone ki, ım molon bəhr qətəşone. Peşo məlum be ki, əvon mınşon bə dast dənoə. Zandəqonədə qıley noxəş, har dıqlə isə siənebən. Az umu kardedəbim ki, zandəqon bəzanden, çəvon şıti bəhvatem, həm ıştəni, həmən ıştə bedədə hırdəni vivay bədom. İsət mandəm avərə - viəvon. Iştəni oqətım, ıştə əğıli oqətım, ım diqlə zandəqo oqətım, ya krediti bıdəm? Zınedənim kovrey xoki bəştə sə ekəm? Im xalqi məşğul kardə proqram ni, xalqi bə dast dənoə proqrame.

Arçon diy sakin Nəsimi Həsənoviən bə muxbiri ıştə norozəti izhar kardəşe ki, bə muğavilə əsasən bey 3 qılə zandəqo doənin bin, 2 qılə doşone. Müğavilədə har moli ğıymət 4800 mənot nişon doəşone, əmo vıjorədə jıqo zandəqon ğıymət 2000 mənotisən boho ni.

Bə real vəziyyəti nəzər səğandeədə hokuməti nəzərədə qətə ım proqrami xeyri məmuron vindedən. Əvon zəhmətkəşə moldarə divojon de bə dast dənoe roy ım proyektiku bəştə şəxsiə mənafe istifadə kardedən.