Az.R-ədə elektrikə enerji behran

Zımıstonədə həvosati sard dəvarde məmləkətədə çe bərğiku istifadə ziyod kardedə. Əmo elektrikə xətton bərbad holədə bıe, məntəğəonədə xeyli problemon bə miyon vardəşe.

“Sputnik Azərbaycan” sayt nıvıştedə ki, 2 manqe Beyləqan şəhrestanədə bə məntəğəon bərği de fasilon har ruj 3-4 saat dodən. Dıminə mışğılən bımədəy ki, şəhərədə bərği ğət kardeədə ovən omedəni, çunki ovi nasoson bebərğ mandeku ko kardedənin. “Azərişıq”i Beyləqan şebədə bə sayti muxbiri parsi cəvob doəşone ki, elektriki xətton təmir karde səbəbiku, hələ 1 manqən vəziyyət ım cur bəbe.

Qeyçay şəhrestanədən əhali elektrikə xətton bərbadə vəziyyəti barədə bə devlətə vəsilon xeyli şikayəton vığandəşone. Meydan TV xəbə dodə ki, rayoni Poti diy sakin Pərvin Umərov bə Qeyçayi Elektrikə şəbəkə şikayət kardəşe ki, bə çey kə omə xətti stolb və kabelon  pıxən, əvoni əvəz karde lozime. Əyo bey votəşone ki, ım materialon əv bəpe bıhırio, bəvədə əvon bomen həmonə xətti təmir bəkarden. Pərvini hətto bə Prezidenti və Vitse-prezidentiən muraciət kardəşe, əmo ımi hiç qıley nəticə doə nişe.

İmsornə iyulə manqi 3-minə ruji Minqəçevir Elektrikə Stansiyadə ğəzo bəpeştə bə Prezident Əliyevi fərmanon əsasən “Azərenerji” Ojə Səhmdarə cəmiyyəti çe devlətə budcəku oktyabri 30-ədə 48 milyon mənot, noyabri 30-ədə 12 milyon, dekabri 17-ədə 30 milyon mənot vəsait səşe. Əmo tosə ısət respublika məntəğon de bərği befasilə təmin karde zınəşon ni.

Bə “Faktxəbər.com”i əsasən ımsor Az.R bərği ixracat bə ponə sori nisbətədə 2 kərə ziyod kardəşe. Əlavən vote lozime ki, əv bə xaric bərği 1 kilovat/saati bə 5 sent, yəni bə 8 kopik həvatedə. Məmləkəti daxilədə isə bə əhali həvatə elektriki 1 kv/saati ğıymət 7 kopikiku tosə 11 kopikie, yəni miyonə ğıymət 9 kopike.