Dini məhbus Telman Şirəliyev çe zindono vadoəşon ni.

Telman Şirəliyev Əhli–Beyt (ə) tərəfdaronədəy. Əv 2012-minə sori oktyabri 5-ədə Təhsilə Vəzarəti bina vədə de hicabi mudafiə əlağədar etirazə aksiyadə iştirak karde səbəbiku bə 6 sor muddəti zindonə cəzo məhkum kardəşonbe.

Bo çey ım zindonə cəzo muddəti orəxe 1 həftə mandə boey tojə cinayətə ko oj kardışone ki, quya zindonədə ıştə baloşi jitono biz niyo kardəşebən. Dekabiri 20-minə ruji Boku şəhəri Xəzər rayoni məhkəmə əv bə 5 manq 18 ruj muddəti tojə zindonə cəzo məhkum kardəşe. Huğuğə mudafiəkaron hokuməti ım hərəkəti səbəbi Şirəliyevi əfv ərizə nıvışteku imtina kardeyədə vindedən.

Nardarani hadisə məhbus, dini fəal Abbas Huseynoviən zindonxonədə bə işqəncon məruz mande barədə doə şikayəti Boku Apellyasiya məhkəmədə təhğiğ kardəşone. Abbasi bə məhkəmə votəşe ki, çey vəkil Yalçın İmanov ım işqəncon bə cəmiyyəti nəzə rosnie qorə çe  Vəkilon Kolleqiyaku beğandışone.

Abbas Huseynovi moə Rəhimə Huseynovan bı barədə bə Azadi Radio mufəssəl məlumat doəşe, votəşe ki, hokumət bə Abbasi doə işqəncə fakton eparçınie pidəşbe. Əmo Yalçın İmanovi bımi imkan nıdoşe. Bi səbəbən hokuməti çeyku ğisas seşe, çey vəkiləti karde imkan dastikuş se. Ombudsmani və Penitensiarə Xidməti koəkon vəkil İmanovi muraciəti bəpeştə çe Abbasi vəziyyəti muayinə karde məcbur bin, çey bədənədə işqəncə rizon deştə çəşon vindışone.  Əmo  de behəyoəti ımşon bə həşə je, işqəncə fakton təsdiğ nıkardışone.

Boku Apellyasiya məhkəmə hakim Kamran Əkbərovən iminə instansiya məhkəmə ğəror ğıvvədə oqətəşe. Rəhimə Huseynova votəşe ki, “əmə çe ım məhkəməku ədalətinə ğəror çəş kardedənıbimon. Çəmə məğsəd ım koy bə Avropa Məhkəmə  bekardeye. Bıdə dınyo bıvindo ki, Azərbaycani zindonxonəonədə insonon bə kom zulmon məruz mandedən. Kosibə odəmon çı curə kudən, bəvon kom dəhşətinə işqəncon dodən. Az pidəme məmləkəti zindononədə məhkum bıə həmə beqınoə odəmon azad bıbon, çımı zoən çəvon dılə`də. Əvon terrorçi nin, əsil mısılmonin.