Dəvardə sori yekunon

2018-minə sor bə orəx rəsedə. Az.R təhlilqəron məmləkəti ımsornə iştisadi jimoni analiz kardedən. Çəvon yek fikir jıqoe, ə məğsədon ki, hokuməti “Strateji Poy xəritə”də elan kardəşbe, ımsorən bəştə məğsəd rəse nızıne.

MM deputat, İğtisadi və Sosial İnnovasiya İnstituti direktor Əli Mənsimli bə “Modern.az” sayti votəşe ki, hokuməti 2018-minə sori iğtisadiyyatədə 2% inkişaf nəzərədə qətəşbe, əmo bımi cəmi 0,8% nail bıe zıne. Respublikadə haliyədə əhali har sor 1,2% ziyod bedə. Jıqo vəziyyətədə çəvon rifahi təmin karde ro iğtisadiyyat hiç nıbo de 4% perosi bəpe ovc bıkardo. Vəhədənə sori 3,6% peros nəzərədə qətə bedə. Əmo məmləkətədə ısətnə iğtisadiə şərait ım rəğəmiən bə şubhə ji dənodə.

Əli Mənsimli hisob kardedə ki, iğtisadiyyatədə mevcud vəziyyət sosial problemon həll karde ro imkanon xeyli kam kardedə. Buscədə sosial xarcon Rusiyadə 36%, Ğazəxıstonədə 44%, Belorusiyadə 46%, Uzbəkistonədə 54%, Az.R-ədə isə 29%-e. Əhali manqə məvacibən çe Rusiyasən 2 kərə, çe Ğazəxıstonisən 1,3 kərə kame. Əhali har 4 nəfərədə 1 nəfəri bə bankon ğarzoxo bıe bə nəzər bısənəmon, postsovet devləton arədə Az.R bardə sosial siyasəti çand ğədər jinə mevğeədə ğəror qəte vinde bəzınemon.

İyo əlovə karde lozime ki, Beynəlxalqə Valyuta Fond 2017-minə sori orəxədə Az.R Umumdaxili Məhsuli həcmi qorə bə dınyo ən kosibə 20 qılə məmləkəton restə daxil kardəşbe, 2016-minə sori dınyo keşvəron arədə 106-minə vırədə mandedəbe. 2018-minə sori yekun nəticə hələ məlum nıboən, məmləkəti daxili təhlilqəron doə analiz nişon dodə ki, ımsornə iğtisadi rəğəmon hiçən ğənaətbəxş nin. Imən Əliyev hokuməti bardə iştisadiə siyasəti iflasiku xəbə dodə.