Az.R-ku əhali miqrasiya dəvom kardedə
Əliyevi hokuməti Respublikadə iğtisadi behrani vəy se nızıne, əhali quzərani həniən qıvonin kardedə. Imən əvoni bə xariciə məmləkəton miqrasiya karde məcburiyyətədə oqətedə.
“Azadlıq.info” xəbə dodə ki, 2014-minə sori behraniku dəvardə 4 sorədə iqlə bə Almaniya 11 həzo Az.R şəhrıvandi bo pənahqah se ro muraciət kardəşe.
Almaniya Miqrasiya və bə Didərqinon dair Federalə İdarə məlumat doəşe ki, 2018-minə sori yanvariku tosə oktyabrə manqi 31-y 1449 nəfər azərbaycanıjə şəhrıvand deport kardəşone. Bə 179 nəfər azərbaycanıji Almaniyadə bo muvəğğəti jimon karde icazə doəşone.
Umumən isə orəxnə 10 sorədə 40 həzo azərbaycanıjə şəhrıvandi bə xariciə devləton bo siyasiə pənahqoh se ro muraciət kardəşe. Sosioloji Monitorinq Mərkəzi azərbaycanıjə didərqinon arədə parseş bardəşe. Çəvon 91% ıştə muhacirəti səbəb Az.R-ədə sosial vəziyyəti qon, manqə məvacibon kam be votəşone.
Azərbaycanıjon bə Turkiyə miqrasiyan vusətine. MM deputat Sərdar Cəlaloğlu etirafən votəşe ki, Naxçıvani əhali 80%-i bə Türkiyə kuç kardəşe. Əqər ım Muxtarə Respublika əhali 400 həzo nəfər bıe bə nəzər bısənəmon, jəqo çəvonədə 320 həzo nəfəri bə Turkiyə muhacirət karde məcburiyyətədə mande məlum bedə. Turkiyə miqrasiya idarə məlumat doəşe ki, çəvon keşvərədə azərbaycanıjə didərqinon miğdar çe Suriya və İrağo vitə fərarion bəpeştə 3-minə vırədə mandedə.
İyo jıqo qıley pars bə miyon beşedə. İrağ və Suriyadə şəhrıvandon arədə canq heste, bı səbəbən əvon bə hamsuə keşvəron pənoh bardedən. Bəs Az.R-ədə de şəhrıvandon kii canq bardedə ki, əvon jıqo xeyli miğdarədə bə xariciə məmləkəton fərar karde məcbur bedən?
