İron və Rusiyə miyono marziyə həmkari mığovilə imzo be.

İroni kişvər vəzarətxonə marziyə koon sədr votışe, İron və Rusiyə 2 qılə kişvəri marzonədə elektronik baste nomo bıə plani barədə həmkariyə mığovilə imzo kardedeşone.

Bə İrna raporti əsos, Şəhriyar Heydəri zinə İroni kişvər vəzarətxonə heyəti bə Rusiyə səfəri(Dekabri 25-30) nəticəon bərnoməon vəsf kardeyədə əlovəş do: İron və Moskva miyono ım marziyə həmkari mığovilə 4 qılə karşınasi iclosi bəpeştə əncom bıə və Rusiyə tərəfo icra bəbe.

İroni kişvər vəzarətxonə marziyə koon sədr təsdiğış kardə: mərziyə kontrolon sahədə 2 qılə kişvəri təcrobəon mıbodilə karde, elektronik və optik texnoloqiyaonku çok istifodə karde iyən de huşinəti sərhədi mudiriyət karde ım səfərədə muhimmə mıvzoon ku bin.