Boku hokumət bə jurnaliston təğibi dəvom kardedə

De Əlievi hokuməti bə jurnaliston təzyiği həniən qıvonin karde əlağədar “Bemarzə Reportyoron” beynəlxalğə təşkilati bəyanat doəşe.

“Azadlıq.info” bə əhandon edaştə ım bəyanatədə votə bedə ki, “məqəvuji Azərbaycani hokumət jıqo fikir kardedə ki, çey bə mustəqil fikrinə jurnaliston kardə həmləon çe beynəlxalğə ictimaiyyəti nəzəriku kənoədə bəmande”.

Məşhurə tədğiğatkarə jurnalist Xədicə İsmayılova çand ruj bə nav de yolə məbləği - 45 həzo 143 mənot cərimə kardəşone ki, quya “Azadi Radio”ədə ko kardeədə verqi doeku imtina kardəşe. “Bemarzə Reportyoron” ımi absurd hisob kardedə, bə səbəb ki, İsmayılova hiç vaxt ım Radioədə maliyyə məsiliyyətış bıə ni. İsət hokuməti çey bə xaric şe səpe ğədəğə noəşe, bey çəşnavi doəşe ki, əqər ıştə təhğiğatonku dast nıkəşo, sənibəton ey dəstqir bəkarden.

   Martə manqədə bloqer Mehman Huseynovi zindonə cəzo bə orəx rəsedəbe. İsət bə çey əleyh tojə cinayətə ko bino kardəşone ki, quya ey bə zindonxonə koəkə zor tətbiğ kardəşe. Isət əv bə 7 sorinə zindonə cəzo məruz mande bəzıne. Huseynovi zindonədə ənəhardə aksiya bino kardəşe.

 Dekabri 28-minə ruji “Criminalaz.com” sayti sərdar Anar Məmmədovi  muhakimə bino bıə. Əv de 12 sorinə zindonə cəzo təhdid bedə.

“Bastaninfo.com” sayti redaktor Mustafa Hacıbəyliən de “hakimiyyəti sərnequn karde” cəhdi ittiham kardedən. Hokuməti ım 2 qılə sayt de iyulə manqi Qəncə haidson əlağədar dəbastəşe.

Reportyoron ım beynəlxalğə təşkilat ğeyd kardedə ki, hokuməti təzyiği nəticədə navğədəmə muxalifə İnformasiya vasiton tam je məcburəyyətədə mandən, mustəğilə jurnaliston məmləkət tərk kardəşone, mustəğilə veb-sayton dəbastə bıən, haliyədə 10 nəfərisən vey jurnalist zindonədəy. Az.R Dınyo Azadi İndeksədə 180 məmləkəti arədə 163-minə vırədə mandedə.