Boku hokumət azad bəninə siyasiə məhbuson sənibəton məhkum kardedə

Azərbaycani siyasiə fəalono ibarət Siyasiə Məhbuson Vahidə Siyahi səpe Ko kardə Qrup nomədə qıley təşkilat heste. Əv Respublika zindonxononədə siyasiə məhbuson vəziyyəti monitorinq kardedə, hokuməti bə çəvon dair kardə ğeyri-ğanuniə əməlon bə dınyo cəmiyyəti nəzə rosnidə.

Dekabri 28-minə ruji “Azadlıq.info”çe ım təşkilati bə azad bəninə siyasiə məhbuson sənibəton muhakimə karde dair bəyanat pevolo kardəşe.

Siyasiə məhbuson huğuği mudafiə kardə ım Qrup bloqer Mehman Huseynovi sənibəton bə cinayətə məsuliyyət cəlb karde siyasi motivinə əməl hisob kardedə. Huseynovi bə azadi beşe ro 2 manqış mandəbe. Hokumət ey çe zindono vanıdoe ro bə jıqo şərməndə metodi dast ğandəşe və ım çəmi əv hiçən iminə kərə ni ki, bə azad fikrinə məhbuson tətbiğ kardedə.

Sabiğ Səhiyyə Vəzir Əli İnsanovi 11 sornə zindonə cəzo 2016-minə sori oktyabrədə orəxedəbe. Həmonə sori avqustədə ey zindonədə oqəte ro bə çey munasibətədə soxtə cinayətə ko oj kardışone və əvşon bə 7 sor muddəti məhkum karde.

2018-minə sori sentyabrədə AXCP sədri muavin Məmməd İbrahimi 3 sornə zindonə cəzo bə orəx rəsedəbe. Zindonxonə rəhbəriyyəti bə çey əleyh sardonə silah oqəte ittiham bə nav doşe və əvış məhbəsədə oqəte.

Hicabi məhbus Telman Şirəliyevi 6 sornə zindonə muddət 2018-minə sori oktyabrədə sə bedəbe. De sardonə silah oqəte ittihami əvşon bə 5 manq 18 ruj muddətinə zindonə cəzo məhkum karde.

Diqər siyasiə məhbus Elnur Cavadovi bo azad bıe ro çand ruj mandə zindonxonə koəkon çey baloşi jitono biz peydo kardışone, və çey cəzo 5 manq 25 rujən ziyod kardışone.

Ko Kardə Qrup ıştə bəyanati orəxədə Avropa hokumət və ictimaiə təşkilaton dəvət kardəşe ki, Az.R hokuməti ki, bəşəri huğuğon mudafiə karde roədə ıştə səpe ehdədari peqətəşe, bəvon əməl karde çeyku tələb bıkon.