Prezident Əliyevi akademikon məvacib ziyod kardışe

AMEA çe Respublika əsasə elmə muəssisəy. Haliyədə əyo 71 nəfər akademik, 111 nəfər muxbir uzv , yəni bə akademikəti namizəd, 1529 nəfər jinə rutbəninə alimon ko kardedən. Prezident Əliyevi dəvardə sori orəxonədə çəvon manqə məvacibi ziyod karde barədə ğəror doşe.

Çe akademikon məvacib 1200 mənotiku bə 2000, muxbir uzvon məvacib 850 mənotiku bə 1200, jinə rutbəninə alimon məvacib isə 350 mənotiku bə 390 və 180 mənotiku bə 210 mənot rosnişe.

“Meydan TV” çand nəfər akademikon siyahi dərc kardəşe ki,  əvon əlavə 2-3 qılə vırədən ko kardedən və əyoən veymiğdarinə məvacib sedən. Həmən həmonə akademik və bə akademikəti namizədon ohilə odəmonin,  ıştə navonə məvacibi 80% ğədərədə pensiyan sedən. Jinə rutbəninə alimon isə əsasən cıvonə odəmonin, çəvon məvacib məmləkətədə miyonə manqə məvacibisən xeyli saru bıe hokuməti bə elmi beetina munasibəti nişon doə əloməte.

Dəvardə rujonədə Dınyo İğtisadi Forumi 140 qılə keşvəri elmiə nəticon indeks elan kardışe. Az.R bı siyahiədə 108-minə vırədə, yəni elmiə sahədə dumoədə mandə keşvəron arədə ğəror qətəşe.

Hejo jıqo əğəliyyəti nəticəj ki, bo har qıley mışğıli həll karde ro çe xarico mutəxəssison cəlb kardedən. Bokuədə zəmin vajiedə, keşvəri alimon çimi səbəbi izah karde zınedənin, çe Yaponiya alimon bə komək vanq kardedən. Çand sor bə nav Kurə ru peşe, ovayzi Arani duzənqahi məntəğəon eqətışe, ım problemi həll karde ro çe Hollandiyaku ixtisasinə alimon dəvət kardışone. Respublika akademikon arədə ım dardi əloci zınəkəs peydo nıbe.

2014-minə sori dee çe Cənibi  Afrika Respublikaku alimon omin Tolışə bandonədə qepard nevinə pələnqi hələn jimon karde və ey muhafizə zərurət bə dınyo cər jeşone. Im koy bə səhmon noe ro hokuməti təcili qıley ekoloji muhafizə təşkilat onoşe, çey səvonən prezidenti kinə Leyla Əliyeva təyin kardışe. Çə vaxtiku 5 sor dəvardə. Tosə 2014-minə sori həmonə pələnqi jimon kardə Tolışə vişon çı cur ancedəbin, ım 5 sori dıroziən ə vişon bə çurə məhvi dəvom kardedən.