2018-minə sori Boku hokuməti bardə iğtisadi siyasəti nəticon

2018-minə sor bə orəx rəse. Dəvardə sori Əliyevi hokuməti bardə siyasəti yekun nəticəon ısət çe Respublika təhlilqəron muzakirə mevzuey.

“Meydan TV” de ım məsələ əlağədar ıştə təhlili məğalədə nıvıştedə ki, dəvardə sori Bokuədə Beynəlxalğə Dıyoə Ticariə Limani, əlvan metalon və ferroxəlitə zavodi, Sumğayıtədə Polıpropilenə zavodi, inşaatə kimyəviə zavodi, “Tabaterra” təməkuə fabriki, Masaluədə Sənaye Məhəllə ıştə fəaliyyəti bino karde məmləkəti istehsalədə ğeyri-natə sektori inkişaf kardovnie roədə muhummə fakton bin.

Xariciə məmləkətonədə, çe Turkiyə Əskişəhərədə TANAP ğazə lulə mərkəz, Natə Emalə Zavod bə istifadə doəşone, Riqa, Varşava, Çini Urumçi və Şanxay şəhəronədə “Azərbaycani Ticarətə Kə”on oj kardəşone.

Əmo ım nailiyyəton iştisadiyyati çe behraniku bekarde ro kifayət  nibe. Im sor ğeyri-natə sektori 1,3% inkişaf kardışe ki, ımiən ğənaətbəxş hisob karde nibəbe. Çunki 2017-minə sori ım sektori 2,4%  inkişafış hestbe. Dınyo Bank və İMT Az.R-ədə Umum Daxili Məhsuli 1,8% ziyod bıe proqnoz doəşonbe, əmo ım peros cəmi 0,8% bıe.

Di Təsərrufati sahədən hokuməti təşəbbuson çəş kardə ğədərədə səmərə nıdoşe. Ekspert Vahid Məhərrəmov votedə ki, çe Prezident Əliyevi məmləkətədə pambəvonəti inkişaf kardovniə plan nəinki bəştə məğsəd nırəse, həmən heyvandarətiş bə qıvoninə vəziyyət eğande. Bəə plani əsasən  har hektarədə 40 sentner pambə qırd karde nəzərədə qətə bedəbe, dəvardə sori har hektarədə cəmi 17 sentner məhsul qırd kardışone. Orəxnə 2 sorədə heyvandarə fermeron zəminon cəvon dasto se nəticən əv bıe ki, ısət keşvərədə qujdi istehsal xeyli saru eqıniə. Məhərrəmov ğeyd kardedə ki, 2018-minə sori bə məmləkət qujdi idxal bə navonə sori nisbətədə 16,3% ziyod bıə.