Bə İron şə azərbaycanıjon miğdar vey bıə

Boku Devlətə Statistika Komitə elan kardəşe ki, dəvardə sori 11 manqədə çe Az.R-ku bə xaric şə şəhrıvandon miğdar bə navonə sori nisbətədə 18% ziyod bıə, bə 4 milyon 464 həzo nəfəri rəsə.

Çımon 33% bə İron, 29% bə Ourciston, 19% bə Rusiya, 12% isə bə Turkiyə səfər kardəkəson bıən. Məxsusi ğeyd karde lozime ki, 2018-minə sori bə İron şəkəson miğdar bə navonə sori nisbətən 69% ziyod bıə. Bə İron azərbaycanıjon əsasən de ticarət, mualicə və ziyarət məğsədi səfər kardəşone.

Orəxnə vaxtonədə bə Az.R omə əcnəbiə turiston miğdar xeyli saru eqıniə. “Faktxəbər” bə “Yeni Musavat”i istinadən xəbə dodə ki, adətən miladi Nuə sor və Nəvuzə idədə çe İron və ərəbiə məmləkətono xeyli turiston bə çəmə keşvər təşrif əvardin. Əmo ımsornə idə mərasimonədə həmonə məmləkətono omə turiston xeyli kam bə çəşi qınidəbin. Əqər çe İronıjə turiston bə kam bıe səbəb çe Ğərbi sanksiyon nəticədə İroni milliə valyuta erjon beyebu, ərəbiə turiston miğdari saru eqınie məmləkəti turistə xidmətə sahonədə ğıyməton kali otelonədə hətto çe Avropa ğıymətonsə boho beye. 

Respublika Turizmə Aqentiyyəti de ictimaiyyəti əlağə şebə sədr Kənan Ğolizadə votedə ki, turizmə infrastrukturonədə devlət bə ğıyməton mudaxilə kardedəni. Ymumən isə vıjorə iğtisadiyyatədə ğıyməton de tələb və təklifi arədə nisbəti muəyyən bedə. Turistə obyekton ğeyri-devlətə, yəni bə səxsi odəmon məxsus muəssisonin. De çəvon muəyyən kardə ğıyməton çəvon biznes mənfəət vardedəbu, inkişaf karde zınedəbu, jəqo çəvon təklif kardə ğıymətonən bə tələbi muvafiğe.

Ğolizadə həmən ğeyd kardəşe ki, məmləkətədə de turizmi inkişafi əlağədar devləti strateji hədəfon hestışe, hokumət bə Devlətə proqrami muvafiğ siyasət bardedə.