Huğuğə mudafiəkaron zindonxonəonədə ğeyri-ğanuniə hərəkətonku norohətin

Dəvardə sori orəxədə çe Az.R huğuğə mudafəkaron “Siyasiə Məhbuson Mudafiə Mərkəzi” Respublika zindodxonəonədə mevcud vəziyyəti həxədə ıştə hesabat bə ictimaiyyəti edaştışe.

Im hesabatədə əvon ğeyd kardışone ki, bə məhbuson munasibətədə işqəncə, rışvəxorəti hələən dəvom hestışe, zindonxonəonədə məhbuson miğdar çe normasən veye, bı səbəbən çəvon mandə şərait xeyli qıvonine. Bə dini və siyasiə məhbuson munasibətədə diskriminasiya, həmən ğərəzkorəti fakton hestin. Diə məkəmon ki, hələ 2011-minə sori Boku hokuməti bə beynəlxalğə təşkilaton hesabat doəşbe ki, əvon bo har məhbusi i rujnə ğida təminati ro 8 avro pul co kardəşone, əmo zindonxonə rəhbəriyyəti bə məhbuson doə hardemoni keyfiyyət xeyli sarue.

“Mısılmonon İbemonə Hərəkati” sədr , dini məhbus Taleh Bağırzadə ailə uzvon çey zindonədə vəziyyətiku xeyli norohətin. Əvon bə Azadi Radio votəşone ki, zindonxonə koəkon de muxtəlifə vasitə ey bə təxribati hərəkəton cəlb karde pidəşone. Bə çey hıte mane bedən, şəvi nimədə ey pekardedən, bə sual-çəvob okırnidən.  Penitensiar Xidməti bə Radio muxbiri doə parsi cəvobədə ım fakton təkzib kardəşe.

Diqər dini məhbus Əbulfəz Bunyadovi səhhətən kritik vəziyyətədəy. Əbulfəz Nardaranədə bə polison silahinə hucumi məruz mandə kəy xıvande. Bə həmlədə polison əv de qolulə jəşone, şikəst kardəşone, ısət tam iflic vəziyyətədə Penitensiar Xidməti Mərizxonədə ıştə 15 sornə zindonə cəzo kəşedə. Bunyadovi ailə uzvon çey qıvoninə vəziyyəti barədə bə Azadi Radio məlumat doəşone.

Co qıley siyasiə məhbus bə Mehman Huseynovi tojə cinayətə ko bino kardəşone. Çey bımi bənə etirazi ənəhardə aksiya elan karde Respublika cəmiyyətədə bə noroziyəti və yanvarə manqi 3-minə ruji siyasiə aksiya səbəb bıe. Polison həmonə aksiya xeyli iştirakəkon bə polisxonə bardışone. Boku şəhəri Nizami rayoni məhkəmə çəvonədə bo 4 nəfəri   20-22 sutkaninə  zindonə cəzo, 4 nəfəriən 300 mənotuku tosə 400 mənoti cərimə  bırişe.