Ordə ğıymət boho bıə

Orəxnə manqonədə Az.R vıjoronədə ordə ğıymət 25% boho bıə. Pozə fəslədə 1 qılə 50 kiloynə ordə kisə ğıymət 21 mənotbe, ısət bə 26-27 mənote. “Strateq.az” sayt xəbə dodə ki, məmləkəti vıjoronədə qıvoninə vəziyyət bə əməl omə. Nun patə muəssisə soybon votedən ki, həni nuni erjonə nevon istehsal bo əvon sərf kardedəni. Ğıyməti boho kardeədən mufəttişon əvoni cərimə kardedən.

Təhlilqəron jıqo bohoçiəti səbəbi Rusiya və Ğəzəxıstonədə qandımi ğıyməti boho bıeədə vindedən. Çunki, Az.R taxıli əsasən çe ım keşvəronku idxal kardedə. Di təsərrufati sahədə ekspert Vahid Məhərrəmov bə Meydan TV votəşe ki, dəvardə sori 11 manqədə bə məmləkət 1 milyon ton qandım idxal kardəşone. Hərçənd ki, Azərbaycani ıştəni de qandımi təmin karde ro potensialə imkanon hestışe. Hokuməti rəsmi məlumatono oşko bedə ki, ımsor 3 milyon ton taxıl istehsal bıə, çey 1 milyon 800 həzo ton qandıme. Əmo hokuməti rəsmiyon etiraf kardedən ki, ımi bo mol-mələ hardovnie ro istifadə kardedən. Yəni Respublika di təsərrufatədə jinə sortinə qandım perosindən ki, çımədə nun pate mumkun ni. Çok əbi ki, Di Təsərrufati Vəzarət məmləkətədə bə barzə keyfiyyətinə qandın perosnie tənəvəc bəmandi. Bəvədə həm keşvəri ğida əmniyyət, həmən əhali de erjonə nuni təmin əbi.

Devlətə Kemruqə Komitə məlumat doəşe ki, de daxili istehsalçion himayə karde məğsədi bə məmləkət idxal bıə məhsulon səpe kemruqə rusumi məbləğ ziyod kardəşe. İğtisadşunas Natiğ Cəfərli bımi jıqo qıley ray doəşe ki, ım, daxili vıjorədə bə bohoçiəti və infilyasiya səbəb bəbe. Bə qorə ki, Azərbaycani iğtisadiyyat tosə ısət hiç qıley məhsuli istehsalədə ıştəni tam təmin karde holədə ni.

Peş Nuə sori Boku vıjoronədə qujdi ğıymətədən peros muşahidə bedə. Çey bəzi nevon ğıymət bə 14 mənot ros bıə.