Bo Ğərəboği mınoğişə həl kardero İroni koməkon.
Azərbaycan Respublikadə İroni səfir bo Ğərəboği bıhrani sulhin həl karde Tehroni həmmə tərəfinə komək iyən cəhdiku xəbəş do.
Bə Ğəfğaz mədəniyə mərkəzi raporti əsos Cəvad Cəhanqirzadə bə Terend Niyuz aqentiyəti votışe: Boku iyən İrəvani miyono har curnə hərbi dave bə məntəğə kişvəron və milləton zidd bəbe.
Əv əlovəş karde: dəvardə Oktiyabrədə İron, Tırkiyə və Azərbaycan Respublikadə xarıci vəziron 3 tərəfi iclosi kənoədə İroni xarıci vəzir Muhəmməd Cəvad Zərif ijən Ğərəboği barədə İroni oşko nəzəri elan karde bəpeştə təkidış karde ki ım mıvzo barədə İroni nəzər əvəz ni bəbe.
3 qılə xarıci vəziron həmonə iclosədə bə hukuməton hakımiyəti həx, ərazi təmamiyyət, marzon rəsmi zıne, bıhranon sulhin həl karde iyən co kişvəron daxıli koonədə mıdoxilə nıkarde təkid kardışon.
Ğərəboği məntəğə barədə Erməniston və Azərbaycan Respublika konfilikt 1988-nə sorədə bino bıə iyən 1992-nə sorədə bənə hərbiyə dave əvəz be.
1994-nə sori Mayə manqiədə Ğərəboği mınoğişə 2tərəfon miyono otəşbast bərğəror bıə əmmo Avropa həmkari və əmniyyəti təşkilati Minsk vositəçiyə qrupi cəhdon ım mınoğişə həl kardey xoto detosə ım zəmoni be nəticə be.
