İlham Əliyevi dəvardə sor bo keşvəri iğtisadiyyati muvəffəğiyyətin zınəşe

Yanvari 11-minə ruji Prezident İlham Əliyevi bə 2018-minə sori nəticon dair Vəziron Kabineti iclas dəvunişe. Votəşe ki, dəvardə sori iğtisadiyyati həmə sahədə peros bə dast vardəmone. Sosial və mədəni sahədən kom tədbiron nəzərədə qətəmon bıe, bəvon nail bıəmon, sosial infrastrukturon həniən inkişaf kardovniəmone, 118 həzo tojə koə vırə oj kardə bıə.

Əmo bə Prezidenti ım nikbinə votəyon  iğtisadi təhlilqəron de şubhə diə kardedən. Ekspert Nemət Əliyevi fikir jıqoe ki, Əliyevi tarif kardə vergi sahədə islahat iqlə bə budcə pur karde xidmət kardedə, bo istehsali stimul bə əməl əvardıni, əksinə bey mane bəbe. Umumdaxili Məhsuli ziyod bıe barədə bə çey votə rəğəmonən etibo karde bedəni. İnfilyasiya 2,3% nişon doe həğiğətiku diəroə fikre, çunki respublikadə ticari və xidməti ğıyməton 2 sornə muğayisəninə təhlil infilyasiya 10%-sən sape bıe nişon dodə.

İlham Əliyevi 2019-minə sor de şair İmadəddin Nəsimi təvəlludi 650-minə sorəqardışi munasibəti “Nəsimi sor” elan karde cəmiyyətədə bə muxtəlifə fikron səbəb bıə.

Meydan TV nıvıştedə ki, Prezidenti ponə sor Cumhuriyyəti sor elan kardışe, əmo 28 may Boku mərkəzədə həmonə Cumhuriyyəti 100 sori ğeyd kardə cıvonon bə inzibatiə cəzo məhkum kardışe. Ey pionə sor İslami həmrayə sor elan kardışe, əmo həmonə sori bə dini fəalon divon qəte, məciton ocınie dəvom kardışe, dini məhbusonədə hiç kəs nıbaxşışe.

Jurnalist Ğənimət Zahidi fikir jıqoe ki, Azərbaycanı cəmiyyət çe Prezidenti ım ğərariku bə jıqo qıley fikir omedə ki, ımsor Əliyevi hokumət əvoni bənə Nəsimi pust bəkarde.