Dınyo reytinqonədə Az.R qətə vırə

Beynəlxalğə təşkilaton bə 2018-minə sori dair dınyo devləton reytinqi elan kardedən. Bənə har sori dəvardə soriən Az.R imic tikiən saru eqıniə.

Çe Yolə Britaniya “The Economist” mahnamə ponə sori demokratiya indeks bəyon kardəşe. Çe Az.R bə pionə sori nisbətədə mevğe 1 pillə saru eqınə, 167 keşvəri arədə 149-minə vırədə ğəror qətəşe. Qurciston 89, Erməniston 103-minə vırədə mandən. Ğeyrəz Ermənistani Makedoniya, Ekvador, Haiti və Tunis devlətonədə demokratiya inkişaf bə çəvon reytinqi musbət təsir kardəşe, əvon pionə sori nisbətədə bə navonə mevğe beşən. 

İMT Sənaye İnkişafə İbemoni dınyo devləton 2018-minə sori “Sənayeədə rəğabət”i indeks elan kardəşe. Bı siyahiədən Az.R 148 qılə keşvəri arədə 103-minə vırədə mandə. Postsovet devlətonədə ğeyrəz Tacikiston, Ğırğızıston, Moldova əmandəyon çe Azərbaycanisən navonə vırədə ğəror ğətəşone. Rusiya 32, Belorus 45, Ğəzəxıston 67, Qurciston 96, Erməniston 101-minə məğamədə mandən.

İğtisadşunas Revşən Ağayev votedə ki, Dınyo İğtisadi Forum keşvəron bə rəğabəti ğabil bıe indeksi de həmonə keşvəri 12 qılə sahədə nişon doə keyfiyyəton muəyyən kardedə. Az.R media azadiədə 140 qılə məmləkəton arədə 133-minə vırə, İnfilyasiyadə 128, sosial sərmayədə 123, budcə şəffafətiədə 116, ğarz se dinamikadə 111, elmiə məğalon miğdarədə 108, korrupsiyadə 102,  məvacibə vergion miğdarədə 106-minə vırəon qətedə. Prezident İlham Əliyev çanədə tarifinə sıxanon bıvotoən, de ım curə nəticon dınyo miğyasədə hiç qıley təşkilat çey idarə kardə keşvəri navğədəmə devlət hisob nibəkarde.

Əliyevi hokuməti rəsmiyon bəştə adəti muvafiğ bə jıqo reytinğə nəticon şərh doəşon ni.