İİR de Az.R həmkarəti həniən zumand bedə

İİR Silahinə Ğıvvon Sər Ğərorqohi rəis qeneral-mayor Məhəmməd Bağeri de Az.R Mudafiə Vəzir qeneral-polkovnik Zakir Həsənovi dəvəti yanvarə manqi 16-ədə bə Boku ome.

Həmonə ruji prezident İlham Əliyevi Məhəmməd Bağıri sərdarəti kardə numayəndə heyət ğəbul kardışe. Az.R Mudafiə Vəzarəti rəsmi sayti xəbə doəşe ki, İlham Əliyevi bı didorədə orəxnə soronədə çəmə dı qılə keşvəri arədə həmkarətion hartərəfinə, həmən hərbiə sahədə inkişafш barədə qəp jəşe, votəşe ki, bı muddətədə prezidenton səviyyədə 10 kərəsən vey vindemonon bımi əyaniə numunəy. Əliyevi həmən ğeyd kardəşe ki, çəmə xalqon tarixən həmişə de yəndı dustiəti və bıyəti şəraitədə jimon kardəşone. Çimi bəpeştən çəmə dustiəti bə həmkarəti tojə nailiyyəton bə dast bəvarde.

Məhəmməd Bağeri çe İİR Prezident Həsən Ruhani səlom bə Prezident İlham Əliyevi rosniəşe, votəşe ki, İroni Ali Rəhbər Ayətillah Seyid Əli Xamenei çəmə keşvəron və xalqon arədə həmkariəti əlağon çimibəpeştən inkişaf kardovnie zəruri zınedə.

Məhəmməd Bağeri sərdarəti kardə numayəndə heyət de Mudafiə Vəzir Zakir Həsənoviən vindemon kardəşe. Tərəfon bı didorədə dı qılə devləton arədə  hərbi texniki, hərbi tibb, hərbi təhsil sahonədə həmkarəti perspektivon, de terrorizmi bahəm mubarizə, reqionədə əmniyyət, ekspertə təşkilaton muştərəkə fəaliyyəton təşkil və həniən co məsəlon muzakirə kardəşone. Didori orəxədə tərəfon bə məram protokoli ğol kəşəşone.

Çe ım səfəri bə nav, yanvari 9-ədə Az.R Sərhədə Xidməti rəis Elçin Ğuliyev İroni Biləsuvar şəhərədə de İİR Sərhədə Ləşkəri komandan Ğasım Rezayi didor kardəşbe. Ey deştə ironıjə həmkari marzi əmniyyəti məsəlon, narkotrafik, kontrabanda, terrorizm və  ğeyri-ğanuniə miqrasiya məsəlon dair molağat bardəşbe. Tərəfon jıqo mışğılon çe arə barde ro dıtərəfinə didoron çimi bəpeştən dəvom karde vacibəti ğeyd kardəşonbe.