Zindononədə məhbuson ənəhardə aksiya dəvom kardedə.

Yanvarə manqi 13-ku Boku 13 numrəninə zindonxonə məhbusonədə İlkin Rustəmzadə, Bayram Məmmədov, Elçin İsmayıllı, Əhsən Nuruzadə, 2 numrəninə zindonxonə məhbusonədə Fikrət Ramazanov, Ğiyas İbrahimov və Rəşad Ramazanovi de bloqer Mehman Hüseynovi həmrayəti əlamətinə ənəhardə aksiya elan kardışone. 2 ruji bədiqə Orxan Baxışlı və Murad Ədilovən bəvon umjən qınin.

Keşvəri siyasiə fəalonədə 5 nəfər və jurnalist Xədicə İsmayılovan “Musavat” partiya ğərarqohədə elan kardışone ki,  bə ım aksiya umjən bedən.

Beynəlxalğə Səlibe Sorx Komitə Boku numayəndon 13 numrəninə zindonxonədə de ənəhardə aksiya dəvuniə məhbuson didor kardəşone, bə çəvırəy rəhbəriyyəti məsləhət zınəşone ki, çəvon səpe  doktorə nəzarəti təmin bıko.

Penitensiarə Xidmət isə ım xəbon təkzib kardedəbe votedəbe ki, cəzokəşə muəssisonədə məhbuson arədə ənəhardə aksiya dəvunəkəs ni.

Yanvari 21-minə ruji Meydan TV xəbə doşe ki, 13 numrəninə zindonxonəku Elcin İsmayıllışon bə 17, Əhməd Nuruzadə isə bə 6 numrəninə cəzokəşə muəssisə ovoştıniəşone. Məhbuson ailə uzvon votedən ki, əvon ıştə ənəhardə aksiya hələən dəvom kardedən.

 Huğuğə mudafiəkar Oqtay Guləliyevi xəbə doəşe ki, məhbəsədə bə aksiya dəvuniə məhbuson təzyiğ nişon dodən. Devlətə Əmniyyətə Xidməti həmkaron bə Bayram Məmmədovi və İlkin Rustəmzadə tars omən ki, əqər bə aksiya orəx nıdon bə zindonxonə daxili ləşkəri sərbazon bəvğanden. Quləliyevi həmən votəşe ki, Az.R iqlə siyasiə məhbuson ne, həmən məhbuson cəmi miğdarədən Avropa məmləkəton arədə navonə vıronədə ğəror qətedə. Orəxnə soronədə məmləkətədə məhkum bıəkəson miğdar 23% ziyod bıə. Haliyədə Respublikadə rəsmən 24 həzo 117 nəfər məhbus heste, əmo təhlilqəron votedən ki, ım, məhbuson əsil miğdarisən xeyli kame. Hətto hokuməti ım rəğəmiən peqətiədə bə əhali har 100 həzo nəfəri 248 nəfər məhbus eqınidə ki, ımən məhbuson miğdarədə Respublika Avropadə bə 3-minə vırə bekardedə.