İ.Əliyevi kali devlətə təşkilaton ləğv kardışe

Prezident İlham Əlievi kali devlətə təşkilaton ləğv karde barədə fərmon doəşe. Bə ım dəsturi əsasən bə Alternativə Enerji Mənbon dair Devlətə Aqentiyyət, Zınəyə Fond, Stratejiə Tədğiğatə Mərkəz təmomən ləğv kardə bedə.

Devlətə Sırri Muhafizə Komissiya Katibat, bə Narkomaniya və Narkotrafiki əleyh Mubarizə Devlətə Komissiya Koəkə Qrup, de Əsir və Qin bıə şəhrıvandon əlağədar Devlətə Komissiya Koəkə Qrup, Az.R Tarif (ğıymət) Şura Katibat ləğv bedə, çəvon fəaliyyəti de ictimaiə əsason sənibəton obənon. Elmi İnkişafə Fond, Boku Beynəlxalğə Multikulturalizmə Mərkəz ki, çe devlətə budcəku maliyyə sedəbin, çimi bəpeşt bə ıştəni maliyyə sistem obəvaşten.

Prezidenti Mudafiə Sənaye Vəzarətən ləğv kardəşe, çey əvəzi “Azərsilah” Ojə Səhmdarə Cəmiyyət onoe həxədə dəstur doəşe.

Ey Devlətə Fitosanitarə Xidmət, Devlətə Baytarə Xidmət, Beməyə Sorton Ğeydiyyatə Devlətə Xidmət, Devlətə Texniki Nəzarətə Xidməton ki, çe Di Təsərrufati Vəzarəti nəzdədə fəaliyyətşon hestbe, bə i qılə Aqrarə Xidməton Aqentiyyəti ilhağ karde barədə fərmon doşe.

Təhlilqəron bə Prezidenti ım islahati musbət ğıymət dodən, əmo kafi hisob kardedənin. Azadi Radio sayt İğtisadşunas Rəşad Həsənovi ğeydon bə əhandon nəzə rosniəşe. Həsənovi votəşe ki, Azərbaycan qıly qədə məmləkəte. Əmo çey devlətə idarə sistemədə təşkilaton həddo ziyode. İyo 17 qılə vəzarət, 8 qılə devlətə komitə, 7 qılə devlətə xidmət, çand qılə devlətə palata fəaliyyətşon heste. Kali təşkilatonədə 11 qılə muavin ko kardedə. Vəziron kabinetədə bənə Verqion Vəzarəti və Devlətə Kemruqə Komitə, və ya Di Təsərrufati Vəzarət və İğtisadi İnkişafə Vəzarət, və ya Mədəniyyətə Vəzarət və Vərzeşə Vəzarəton hestin ki, bə yəndı paralelin, əvoni de yəndı ilhağ karde roy vəzarəton miğdari həniən kam karde mumkune.

Prezidenti Adminstrasiyadə bə ım sahon nəzarət kardə vəsilonən bə nəzər bısənəmon devləti icra hakimiyyəti tərkibədə bo ixtisari, demiən bo budcə vəsaiti ğanət karde ro həniən çanədə imkanon bıe oşko vinde bəbe.