Bə Yunis Səfərovi zindonədə işqəncə dodən

Dəvardə sori iyulə manqi 3-minə ruji Yunis Səfərovi Qəncə şəhəri icra hakimiyyəti sərdar Elmar Vəliyev de qolulə jeşe. De ımi , həmən peşonə etirazə aksiya və iğtişaşon əlağədar xeyli dindarə fəal dəstqir, 10 nəfərisən vey şəhrıvand isə polisə ğıvvon tərəfo tələf kardışone.

Respublika Sər Prokuror Zahid Qaralovi orəxnə məlimatiku oşko bedə ki, 18 nəfər de terrorə ittihami bə məsuliyyət cəlb kardəşone, 11 nəfərən bə beynəlxalğə axtarış doə bıə. Qaralovi ımən votəşe ki, de Yunis Səfərovi mudafiə məğsədi “İğtişaşi” təşkil kardə 59 nəfər dəstqir kardəbə. Çəvonədə 36 nəfəri barədə 4 qılə məhkəmə muhakimə bə Qəncə Qonə Cinayəton Məhkəmə vığandə bıə. Diqərion barədə istintağə ko dəvom kardedə.

Sər prokuror “diqərion” voteədə həmən ım hadison əsasə səbəbkar Yunis Səfəroviən nəzərədə qətedə. Marağinə cəhət bımədəy ki, tosə ısət Yunisi istintağ bə orəx rəsəni, əmo 36 nəfəri məhkəmə bino bıə, 1 nəfər – Rza Səfərsoy isə hətto “Fasebook”ədə Yunisi mudafiə kardə statuson nıvışte səbəbiku bə 2 sornə zindonə cəzo məhkum bıə.

Xeyli vaxt çe Yunis Səfəroviku soəx nıbe səbəb bıe ki, Meydan TV bə çey moə istinadən Yunisi zindonədə kışte ehtimal bə nav doşe. Peş ımi Penitensiar Xidməti rəsmən elam kardışe ki, Yunis Səfərovi kışte xəbə dıvie, çey vəkil mutəmadi dey vindemon kardedə.

Meydan TV Penitensiarə Xidməti təkzibi bəpeştə bə Devləti Əmniyyətə Xidməti anonimə mənbə əsasən xəbə doşe ki, Yunisi çəvon zindoni 31-minə kameradə oqətedən. Vəziyyətış hiçən çok ni, bey de elektriki qonə  işqəncon dodən.

Az.R zindononədə bə məhbuson işqəncə doe fakton ısət bə həmə dınyo məlume. “Milli Şura” sədr Cəmil Həsənli votəşe ki, dınyo ictimaiyyət bəpe de İlham Əliyevi işqəncə laboratoriyon əlağədar təhğiğaton bino bıkardo.