Taleh Bağırzadə bə bəşəri huğuğon mudafiə təşkilaton muraciət kardəşe

Boku zindononədə bə dini və siyasi məhbuson işqənçə doə əməlon dəvom kardedə. De jıqo ğeyri-insonə hərəkəton əlağədar “Mısılmonon İbemonə Hərəkati” sədr Taleh Bağırzadə bə benəlxalğə bəşəri huğuğon mudafiə təşkilaton, bə sosialə şəbəkə fəalon, bə “Milli Şura” muraciətən votəşe ki, “Ğobustani zindonxonədə qıley bəşəriə faciə icra bedə. Bımi biqonə məmandən”.

Bağırzadə nezə əvlodon bə Meydan TV xəbə rosniəşone ki, Taleh de telefoni  qəp jəşe, votəşe ki, Nardarani məhbus Cabbar Cabbarov noxəşe, əmo zindonxonə rəis Avtandil Ağayevi əv şəxsən kuəşe, çəyo bə  bə 15 sutkəninə “kars” dənoəşe. Taleh həmən ğeyd kardəşe ki, bə çey munasibətədən təhdid və şantajə rəftoron arə dodənin. Əv çe həmomi xidmətiku, bə ojə həvo beşe imkaniku xeyli vaxte ki, məhrum kardəşone. Əlavən votəşe ki, əqər bə çey munasibətədə jıqo ğeyri-ğanuniə əməlon dəvom bıko, əv bemuddətinə ənəhardə aksiya bino bəkarde.

“Azadlıq.info”ən çe Abbas Huseyni moə doə məlumat bə əhandon nəzə rosniəşe. Məlum bıə ki, Abbas çe Ğobustani zindonxonəku bə Kurdəxonə məhbəs ovoştonie bəpeşt iyoən bə işqəncon məruz mandedə. Çey moə dey zindonxonədə didor kardəşe, çey bədəni muxtəlifə vıronədə xeyli işqəncə rizon vindəşe.

Penitensiarə Xidməti rəsmiyon isə bəştə kanə vərdışi muvafiğ ım fakton təkzib kardedən.

Siyasiə Məhbuson Mudafiə Mərkəzi bə məhbuson işqəncə doə fakton barədə bəyonat doəşe, hokumətiku tələb kardəşe ki, Daxili Koon Vəzarəti de Mutəşəkkilə Cinayəton Mubarizə İdarə ko bəpe təftiş kardə bıbo. İm idarədə, həmən zindonxononədə bə məhbuson işqəncə doə koəkon və çəvon rəhbəron bəpe bə cinayətə məsuliyyət cəlb bıbon.