Tojə vərzeşə komplekson
Bə 2014-2018-minə soron yekuni dair konfransədə Prezident İlham Əliyevi votışe ki, rayononədə 44 qılə Olimpiya Vərzeşə Komplekson fəaliyyət nişon dodən. Imsor 3 qılə rayonədən jıqo komplekson inşa bəkardemon. Bı rujonədə ey bo Tərtər rayoni OVK inşa bə sə je məğsədi çe devlətə budcəku 10 milyon 993 həzo 900 mənot pul co kardışe.
Meydan TV bə Vərzeşi vəzir Azad Rəhimovi votəyon əsasən xəbə dodə ki, Tərtər rayoni OVK Respublikadə 44-minə jıqo muəssisə bəbe. Imsor Lankonədən vərzeşə kompleks bə istifadə bədon. Qeranboy və Natəçolə rayononədə jıqo komplekson inşa bino kardə bıə, Beyləqan və Yardımliədə vərzeşə komplekson inşa dəvom kardedə.
Eksperton ım muəssison səmərə nıdoe çand bəjəm ğeyd kardəşone. Çəvonədə vey qılon bo vərzeşi ne, bo co məğsədon istifadə kardə bedən, əhali əksəriyyət ım komplekson xidməiku istifadə imkanədə ni. Im muəssison məmləkəti vərzeşi inkişafədə, şəhrıvandon arədə vərzeşi bə kutləvi hol peqarde ro jəqo qıley rolən nişone.
Beynəlxalğə musabiğatonədə Az.R komanda heyəti əksəriyyəti leqionerono, yəni xariciə vərzeşkarono ibarət bıe bə təhlilqəron imkan dodə ki, Əliyev hokuməti məmləkəti daxilədə vərzeşi inkişaf kardovnie ro məsrəf kardə de 100 milyon mənot budcə vəsaiton besəmər mande bıvoton. Jıqo ocizonə vəziyyəti sərost karde, bı sahədə vadoə səhvon, neqativə əməlon çe arə barde ro səy karde əvəzi, hokuməti vərzeşə siyasəti de kanə metodon dəvom karde, devlətə budcəku bə ım məğsədi əlavə 10 milyononən bə vo doe səbəb bəbe.
